Ikimenyetso Luvumbu yakoze yishimira intsinzi cyateje impagarara

Ikimenyetso Luvumbu yakoze yishimira intsinzi cyateje impagarara

Ejo ku Cyumweru tariki 11 Gashyantare 2024, ku munsi wa 20 wa shampiyona yo mu Rwanda, ikipe ya Rayon Sport yatsinze Police FC 2-1, ariko ibibazo byahise bivuka nyuma y’ikimenyetso cyateje impagarara kuko siporo yavanzwe na Politiki ya Repubulika Iharanira Demokarasi ya Congo (RDC).

Ku munota wa 53, Rayon Sports yafunguye amazamu kuri Coup-Franc yatewe na Hertier Luvumbu Nzinga, umupira ujya mu rushundura. Nubwo igitego cyanyoye ariko, ibyakurikiyeho byateje impagarara mu bitangazamakuru no ku mbuga nkoranyambaga kuko ari cyo kimenyetso Abanyekongo bakomeje gukoresha basa n’abasiga icyasha u Rwanda.

Luvumbu ukomoka muri RDC,  amaze gutsinda igitego yishimiye igitego cye nk’undi mukinnyi wese watsinda igitego ajoresha icyo kimenyetso cyakwirakwijwe n’ubuyobozi bw’icyo gihugu ko muri RDC harimo gukorwa Jenoside ariko bukanashimangira ko u Rwanda ari rwo rubyihishe inyuma.

Ni ikimenyetso gikorwa hashyirwa mu gahanga intoki ebyiri ari zo Mukubitarukoko na Musumbazose zo ku kiganza cy’iburyo (bishobora gusobanura impunda) mu gihe ikindi kiganza gishyirwa ku munwa (bishobora gusobanura kubuza umuntu uburenganzira bwo kuvuga no kumurenganya).

Ubwo Luvumbu yagaragazaga icyo kimenyetso, Umukinnyi wa Rayon Sport Isaac Mitima, yahise amuturuka inyuma aramusimbukira ahita amanura amaboko ye.

Ni ibintu byakorewe imbere ya camera ku buryo uwari ukurikiye umupira kuri televiziyo yabibonye neza.

Ku mbuga nkoranyambaga hari abagaragaje kutishimira ibyakozwe na Luvumbu, bavuga ko Politiki idakwiye kuvangwa na Siporo.

Umwe mu bakoresha urubuga rwa X yagize ati: “Hari kwibazwa niba yabikoze abigambiriye cyangwa atari abizi kuko hari icyo byari bisobanuye ku Banyarwanda.”

Uwitwa Patrick Ndengera usanzwe afana Rayon Sport, we yagize ati: “Ibi bintu Luvumbu bamubwire ko Football itavangwa na Politiki abireke. Siporo ni Gahuzamiryango”.

Mu kiganiro Rirarashe gitambuka kuri TV na Radio 1, ubuyobozi bwa Rayon Sport bwavuze ko buri mu nama kubera imyitwarire Luvumbu yagaragaje nyuma yo gutsinda igitego.

Umunyamabanga Mukuru wa Rayons Sport, Namenye Patrick, yagize ati: “Turi mu nama, twaza kugira icyo tubigarukaho turangije inama.”

Kugeza ubu Ishyirahamwe ry’Umupira w’amaguru mu Rwanda (FERWAFA) ndetse na Minisiteri ya Siporo ntacyo baratangaza ku byakozwe n’uyu mukinnyi w’Umukongomani.

Ibi bibaye mu gihe mu mikino y’igikombe cy’Afurika, hari Televiziyo yo muri Congo yanze kwerekana abakinnyi b’ikipe y’iki gihugu bakora ikimenyetso cyakozwe na Luvumbu.

Leta Congo yahise ifatira ibihano bikomeye iyo televiziyo birimo no kuyihagarika.

Sangiza abandi iyi nkuru
Ibitekerezo 4
lg

Icyo akwiye nukwirukanwa agasubira iwabo ibi si ibikino yabikoze abizi neza abishaka

Mugisha

Andika Igitekerezo hano AZAGARUKA

keti

ru.vumbuwe.ntitwa kwangaga.wijyende reneza

faustin hagumimana

Andika Igitekerezo hano NTABWOYARABIZI

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27