Volleyball: KCB yegukanye igikombe cy’Afurika, APR VC iba iya 6 naho RRA VC iba iya 9

Kuva taliki 22 kugeza 31 Gicurasi 2022 muri Tunisia habereye  irushanwa ry’Afurika  ry’amakipe yabaye aya  mbere iwayo mu bagore « African Women’s Volleyball Club Championship 2022 ».

Iri rushanwa ryari ribaye ku nshuro ya 29 ryegukanwe n’ikipe ya KCB yo muri Kenya itsinze ku mukino wa nyuma ikipe ya Al Ahly mu Misiri. Ikipe ebyiri zari zaserukiye u Rwanda, APR VC yasoreje ku mwanya wa 6 mu gihe ikipe ya  RRA VC yasoreje ku mwanya wa 9.

Ikipe ya RRA VC yaherukaga muri iyi mikino muri 2019 aho yasoreje ku mwanya wa 10 naho APR VC  yo yaherukagayo muri 2017 na yo ikaba yarasoreje ku mwanya wa 10. Ikipe ya RRA VC kugeza ubu ni yo  ifite agahigo ko kwitwara neza muri iyi mikino kuko muri 2018 yasoreje ku mwanya wa 5.

Iri rushanwa  ryari ryitabiriwe n’amakipe 16   aho yari mu matsinda 4, ikipe ya RRA VC yari iri  mu itsinda A hamwe na CO Kelibia (Tunisia),La LOI VC (RDC) na  FAP (Cameroun). Itsinda B ririmo Carthage (Tunisia), ASEC Mimosa (Cote d’Ivoire), KCB (Kenya) na  Ndegge (Uganda). Itsinda C rigizwe na Kenya Prisons (Kenya), National Alcohol (Ethiopia), APR VC (Rwanda)  na  CNS (Nigeria)  naho itsinda D ririmo NCS (Nigeria), Kenya Pipeline Company (Kenya), Al Ahly (Misiri) na El WAK Wings (Ghana).

Nyuma y’imikino yo mu matsinda habaye imikino yo gukuranamo kugera ku mukino wa nyuma aho ikipe ya  KCB yo muri Kenya yegukanye igikombe  itsinze  ikipe ya Al Ahly yo mu Misiri amaseti 3-1 (25-18,25-22,11-25 na 28-26). Mu guhatanira umwanya wa 3, ikipe ya Kenya Pipeline Company  yo muri Kenya  yatsinze Club Féminin de Carthage yo muri Tunisia amaseti 3-2 (20-25,25-23, 19-25, 25-23 na 15-11).

Ikipe ya KCB ni igikombe cya kabiri yegukanye  kuko muri 2006 yegukanye iki gikombe nabwo itsinze Al Ahly. Uyu wari umukino wa 3 aya makipe ahuriye ku mukino wa nyuma  kuko muri 2009, Al Ahly yatsindiye  KCB ku mukino wa nyuma.

Umutoza Paul Bitok watoje  mu Rwanda  igihe kinini ni we wafashije iyi kipe ya KCB kwegukana igikombe cy’Afurika muri 2006 na 2022.

Uko amakipe yakurikiranye

KCB (Kenya) yakurikiwe na Al Ahly (Misiri)Kenya Pipeline Company (Kenya), Club Féminin de Carthage  (Tunisia), Kenya Prisons (Kenya) , APR VC (Rwanda), FAP (Cameroun), CO Kelibia (Tunisia), RRA VC (Rwanda), Ndejje University (Uganda, Nigeria Customs Service (Nigeria), CNS (Nigeria), La LOI VC (RDC), El WAK Wings (Ghana), NAL (Ethiopia) na ASEC Mimosa (Cote d’Ivoire).