Volleyball: Gisagara VC yakuyemo ikinyuranyo cy’amanota yarushwaga na REG VC

Ikipe ya Gisagara VC mu bagabo  yitwaye neza yegukana agace ka 6 “Phase 6” ka shampiyona  y’icyiciro cya mbere muri Volleyball “Rwanda National Volleyball League 2022-2023” ikuramo ikinyuranyo cy’amanota 3 yarushwaga na REG VC yari imaze iminsi iyoboye urutonde.

Taliki 17 na 18 Ukuboza  2022 ni bwo imikino y’umunsi wa 6 “Phase 6” muri  shampiyona y’icyiciro cya mbere muri Volleyball “Rwanda National Volleyball League 2022-2023” mu bagabo n’abagore yabereye mu Karere ka Ruhango.

Mu bagabo, imikino y’amajonjora yabereye ku bibuga biri imbere y’Akarere ka Ruhango aho  ikipe ya APR VC yatsinze Kirehe VC amaseti 3-2 (25-18, 25-20, 22-25, 26-28 na 15-9), Gisagara VC itsinda IPRC Musanze VC amaseti 3-0 (25-18, 25-14 na 25-16), ForeFront VC itsinda IPRC Ngoma VC amaseti 3-1 (15-25, 26-24, 25-21 na 25-16) naho ikipe ya REG VC itsinda KVC amaseti 3-0 (25-18, 25-18 na 25-19).

Mu mikino ya  ½ cy’irangiza, ikipe ya APR VC yatsinze REG VC amaseti 3-0 naho Gisagara VC itsinda ForeFront VC amaseti 3-1.

Mu guhatanira umwanya wa 3, ikipe ya ForeFront VC yatsinze REG VC amaseti 3-2.

Umukino wa nyuma  Gisagara VC itsinda APR VC amaseti 3-0 (25-17, 26-24 na 25-18).

Agace ka 6  karangiye ikipe ya Gisagara VC  iyoboye n’amanota 8, APR VC (7), ForeFront VC (6), REG  VC (5), Kirehe VC (4), IPRC Ngoma VC (3), IPRC Musanze VC (2) na KVC (1).

Muri rusange, ikipe ya REG VC nubwo yatakaje amanota yakomeje kuyobora urutonde n’amanota 42 inganya na Gisagara VC iri ku mwanya wa kabiri. APR VC iri ku mwanya wa 3 n’amanota 36 ikurikiwe na ForeFront VC (34), IPRC Ngoma (23), Kirehe VC (19), IPRC Musanze VC (14) na KVC (6).

Mu bagore, APR VC  imaze kwegukana uduce twose

Mu bagore, mu mikino y’amajonjora  ikipe ya ForeFront VC yateye mpaga S^t Bernadette VC (amaseti 3-0), RRA VC yatsinze IPRC Kigali VC amaseti 3-0 (25-17, 27-25 na 25-15) naho Ruhango VC itsinda IPRC Huye VC amaseti 3-0 (25-12, 25-22 na 25-21).

Mu mikino ya ½ cy’irangiza,  ikipe ya ForeFront VC yatsinze Ruhango VC amaseti 3-0 naho APR VC itsinda RRA VC amaseti 3-1.

Mu guhatanira umwanya wa 3, ikipe ya RRA VC yatsinze Ruhango VC amaseti 3-0  naho mu guhatanira umwanya wa mbere, ikipe ya APR  VC itsinda ForeFront VC amaseti 3-1 (18-25,25-23, 25-16 na 32-30).

Ikipe ya APR  VC yasoje iyoboye agace ka 6   n’amanota 7 ikurikirwa na ForeFront VC (6), RRA VC (5), Ruhango VC (4),  IPRC Kigali VC (3), IPRC Huye VC (2) na S^t Bernadette VC (0).

Muri rusange nyuma y’uduce 6, ikipe ya APR VC ni yo iyoboye n’amanota 42 ikaba yaramaze no kwegukana igikombe, ikurikiwe na ForeFront VC (36), RRA VC (30), Ruhango VC (23), IPRC Huye VC (15), IPRC Kigali VC (12) na S^t Bernadette VC (5).

Imikino  y’umunsi wa 7 “Phase 7” izabera mu Karere ka Ngoma taliki 07 na 08 Mutarama 2023.