Volleyball: Amakipe 16 ni yo azitabira ‘Zone V’ izabera i Kigali

Volleyball: Amakipe 16 ni yo azitabira ‘Zone V’ izabera i Kigali

Amakipe 16 mu bagabo n’abagore aturutse mu bihugu bine byo mu karere k’Afurika y’Iburasirazuba ni yo azitabira Irushanwa Nyafurika rihuza ayabaye aya mbere iwayo muri Volleyball “CAVB Zone V Volleyball Club Championship 2023”.

Iri rushanwa riteganyijwe kubera i Kigali guhera kuri uyu wa Mbere tariki 13 kugeza ku ya 20 Ugushyingo 2023 muri BK Arena.

Umuyobozi wa Zone V, Ruterana Fernand Sauveur, yavuze ko bari biteze amakipe avuye mu bihugu byinshi ariko kubera ubushobozi amwe agorwa no kwitabira.

Yagize ati: “Dutangira twari twiteze ko dushobora kubona amakipe 12 avuye muri bya bihugu 12 bigize ‘Zone V’ buri gihugu kikatwoherereza ikipe wenda imwe ariko bitewe n’imiterere y’iyi Zone V (aho ibihugu biherereye), byarangiye habonetse ibihugu bitatu gusa kongeraho u Rwanda rwakiriye.”

Muri rusange iri rushanwa rizitabirwa n’amakipe 16 azava mu Rwanda, Kenya, u Burundi na Uganda mu bagabo n’abagore.

Mu Bagabo, u Rwanda ruzahagararirwa n’amakipe yabaye aya mbere muri shampiyona ari yo Gisagara VC, APR VC, Police VC, REG VC na Kepler University yahawe ubutumire.

Mu makipe azava hanze harimo Sports-S yo muri Uganda, Rukinzo na Amical z’i Burundi, Equity na Prisons VC zo muri Kenya.

Mu Bagore, u Rwanda ruzahagararirwa n’amakipe atatu ari yo RRA WVC, APR WVC na Police WVC. Hari kandi Pipeline yo muri Kenya, Muzinga/WSG y’i Burundi na KCCA yo muri Uganda.

Muri iri rushanwa hazahembwa amakipe atatu ya mbere muri buri cyiciro ndetse n’abakinnyi bitwaye neza mu bihembo bifite agaciro k’ibihumbi 20 by’amadolari y’Amerika.

SHEMA IVAN

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27