Urubyiruko rw’u Rwanda rwibukijwe inshingano zikomeye Isi irwitezeho

Urubyiruko rw’u Rwanda rwibukijwe ko rufite inshingano ziremereye zo kugena icyerekezo cy’Isi y’ahazaza ruzaba ruyoboye mu myaka iri imbere, bikazashoboka mu gihe rubashije kwitandukanya n’imyitwarire mibi irimo kunywa ibiyobyabwenge, kwiyandarika n’ibindi, ahubwo rukibanda ku kubaka ibifite umumaro. 

Ku Munsi Mpuzamahanga w’Abatuye Isi wizihirijwe mu Karere ka Nyagatare ku rwego rw’Igihugu, Minisiteri y’Urubyiruko n’Iterambere ry’Ubuhanzi (MoYA) yashimangiye uburyo icyizere cy’ahazaza h’abatuye Isi gishingiye ku mahitamo y’urubyiruko rw’uyu munsi. 

Umunyamabanga Uhoraho muri iyo Minisiteri, Ishungure Parfait yagize ati: “Abazaba batuye Isi mu bihe bizaza ni abari mu myaka y’urubyiruko uyu munsi. Kugira ngo tugire icyizere ko abatuye Isi by’umwihariko Igihugu cyacu, bazaba bafite imibereho myiza birasaba ko tugira urubyiruko rukora, rukihangira imirimo rugategura ejo heza twifuza.”

Akomeza agira ati: “Urubyiruko rurasabwa kwishakira ibisubizo rushingiye ku mahirwe rwashyiriweho n’ubuyobozi bwiza dufite. Ibi urubyiruko ruzabigeraho kandi ariko uko rwitandukanije n’ibidafite umumaro birimo inzoga, ibiyobyabwenge n’ibindi.”

Ishungure ashima urubyiruko rwafashe iya mbere rugatangiza ibikorwa by’indashyikirwa binatanga akazi kuri bagenzi babo.

Bamwe mu Basore n’inkumi baganiriye na Imvaho Nshya, bashima uko Leta ibatekerezaho mu buryo butandukanye ndetse bakanashyigikirwa mu bitekerezo byabo bigamije guhanga imirimo no kwiteza imbere.

Mutuyimana Dismas ukora ubworozi bw’ingurube mu buryo bw’umwuga, yagize ati: “Dushima inama duhabwa n’abayobozi bacu ndetse n’uko bakomeza kudufata akaboko mu gushyira mu bikorwa imishinga yacu. Ku munsi nk’uyu w’abatuye Isi kandi nishimira ko nawizihije nanjye mfite icyo nkora kuri iyi si kigira uruhare mu kuyiteza imbere nihereyeho ndetse n’Igihugu cyanjye.”

Mumararungu Dorianne ukora umwuga wo gutunganya amafoto na we avuga ko afite inshingano yo kugira ibyo ahindura kugira ngo abe umuturage utanga icyizere ku hazaza heza h’Igihugu ndetse n’Isi.

Ati: “Nk’umukobwa wize ibijyanye no gutunganya amafoto, nahisemo kubikora mbikunze kugira ngo ubumenyi bwanjye mbubyaze umusaruro. Numva uko ntera imbere ngatanga serivisi ku bazikeneye nzaba ngize uruhare mu gutanga umusarururo ku kuzagira Igihugu cyifuzwa ndetse n’Isi irangwa n’imibereho myiza n’iterambere ry’abayituye.”

Raporo y’Umuryango w’Abibumbye ku bwiyongere bw’abatuye Isi igaragaza ko muri uyu mwaka wa 2026, Isi ituwe n’abasaga miliyoni 8,3 bakaba bitezweho kuzaba bageze kuri miliyari 9,5 mu mwaka wa 2050.

Mu Rwanda kuri ubu abarutuye babarirwa muri miliyoni zisaga 14,4 bakazaba bitezweho kuzaba bageze kuri miliyoni 22 mu mwaka wa 2050 nk’uko biteganywa n’imibare y’Ikigo cy’Igihugu cy’ibarurishamibare mu Rwanda.

Minisiteri y’Urubyiruko n’Iterambere ry’Ubuhanzi yatangaje ko kugira ngo abo baturage bazabashe kubaho neza, abavuka n’ababyiruka bakwiye guhindura imyumvire ndetse bagahindura imikorere mu buryo butanga umusaruro mwishi ushobora guhaza abaturage mu mirire ndetse no mu bindi bikorwa by’iterambere bakenera.