Unity Club Intwararumuri igiye kuganira kuri NST2 n’ibikibangamiye ubumwe

Unity Club Intwararumuri igiye kuganira kuri NST2 n’ibikibangamiye ubumwe

Umuryango Unity Club Intwararumuri ufatanyije Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) wateguye Ihuriro ryawo rya 17, rizibanda by’umwihariko ku ngamba zo kwihutisha gahunda y’iterambere y’imyaka itanu ya Guverinoma (NST2) no gucoca ibikibangamiye ubumwe bw’Abanyarwanda.

Iri huriro ngarukamwaka rigiye kuba ku nshuro ya 17, muri uyu mwaka riteganyijwe kubera muri Kigali Convention Centre ku wa 16 Ugushyingo 2024.

Ihuriro rya 17 rya Unity Club Intwararumuri rizibanda ku gukomeza kwimakaza umuco w’ibiganiro byubaka kandi bishimangira indangagaciro na kirazira z’umuco Nyarwanda.

Itangazo rigenewe abanyamakuru rigaragaza ko muri uyu mwaka iri huriro rifite insanganyamatsiko igaruka kuri “Ndi Umunyarwanda, Igitekerezo ngenga cy’Ukubaho kwacu.’’

Ibiganiro bizatangwa bizibanda ku ntero igira iti “Amateka n’uruhare rw’indangagaciro z’Umuco Nyarwanda mu kwimakaza imyumvire n’imitekerereze ihamye”.

Rikomeza rigaragaza ko iri huriro rigiye kuba mu gihe igihugu kikiri mu ntangiriro za gahunda yacyo y’imyaka itanu yo kwihutisha iterambere, izwi nka NST2, iteganyijwe mu 2024-2029.

Rigira riti “Nk’Intwararumuri ziri ku ruhembe rwo kwesa imihigo ikubiye muri iyi gahunda, ni umwanya ku bayobozi bazaba bateranye wo gukora ubusesenguzi bugamije kwihutisha no kunoza ibyo bakora, batekereza kandi bamurikira u Rwanda n’Abanyarwanda.’’

Biteganyijwe ko mu Ihuriro rya 17 kandi Minisiteri y’Ubumwe bw’Abanyarwanda n’Inshingano Mboneragihugu izamurika ishusho y’ubumwe bw’Abanyarwanda muri iki gihe ndetse n’ibikibangamiye uru rugendo birimo ibisigisigi by’amacakubiri, ibikomere n’ihungabana, imikoreshereze mibi y’imbuga nkoranyambaga, byose bigira ingaruka mbi ku mibanire n’ubusugire bw’imiryango.

Igipimo cy’ubumwe bw’Abanyarwanda cyatangajwe mu mwaka wa 2020 cyerekanye ko buhagaze kuri 94.7%.

Ihuriro rya 17 rya Unity Club Intwararumuri rizabanzirizwa n’Inteko Rusange y’abanyamuryango bayo, izaganirirwamo ubuzima bw’umuryango no kwakira abanyamuryango bashya 19.

Hanateganyijwe ihuriro rigari ryatumiwemo abayobozi bo mu nzego nkuru za Leta, n’iz’ibanze, abahagarariye sosiyete sivile, abanyamadini, urubyiruko ndetse n’abarinzi b’igihango ku rwego rw’Igihugu.

Muri iri huriro rizitabirwa n’abantu barenga 350 hateganyijwe igitaramo kizanatangirwamo ishimwe ku barinzi b’igihango ku rwego rw’Igihugu mu mwaka wa 2024.

Umuryango Unity Club Intwararumuri ugamije gutanga umusanzu mu kubaka ubumwe bw’Abanyarwanda, ugizwe b’abayobozi bari muri Guverinoma n’abayihozemo n’abo bashakanye. Watangijwe na Madamu Jeannette Kagame.

Uyu muryango, kuri ubu ubarizwamo abanyamuryango 332, washinzwe muri Gashyantare 1996, wiha intego yo kwimakaza umuco w’ubumwe n’amahoro, byo nkingi z’iterambere rirambye.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27