U Rwanda rwashimangiye ukwiyemeza rushyira mu kubungabunga amahoro

U Rwanda rwashimangiye ukwiyemeza rushyira mu kubungabunga amahoro

Leta y’u Rwanda yashimangiye umurava no kwiyemeza gukomeza   gushyigikira ibikorwa byo kubungabunga amahoro ku Isi, ariko igaragaza ko hakenewe amavugurura mu mikorere y’Ingabo z’Umuryango w’Abibumbye (Loni) kugira ngo zikore neza n’abasovile barindwe.

Ibyo byagarutsweho na Minisitiri w’Ingabo w’u Rwanda Juvenal Marizamunda ubwo yari mu nama ya 2025 yo ku rwego rwa ba Minisitiri yiga ku bikorwa byo kubungabunga amahoro ku Isi (UN Peacekeeping Ministerial), yabereye i Berlin mu Budage.

Minisitiri Marizamunda yashimangiye ko hakenewe amavugurura mu bikorwa byo kubungabunga amahoro himakazwa kudasumbanya mu butumwa bwose.

Yagaragaje akamaro k’ibyo biganiro ndetse avuga ko hakenewe guhuza ibikorwa n’umusaruro ubivamo kandi hagashyirwaho ibipimo bifatika bifasha kumenya niba intego ziba zaragezweho koko.

Yagize ati: “Nta gihe cyiza kiruta iki kuko nemera ko bizatanga ibisubizo kuri bimwe mu bibazo bikomeye ingabo zacu ziri guhura nabyo.”

Yagaragaje ko abasivile bakeneye gucungirwa umutekano, hakarwanywa amagambo y’urwango, hakarebwa imizi y’ibibazo harimo imiyoborere mibi, amacakubiri na za ruswa.

Yagize ati: “Ikibazo hari amakuru y’ibihuha, kuba hari ayumvwa nabi, amagambo y’urwango n’urugomo bikomeza kubangamira umutekano w’abasivile mu duce turimo amakimbirane.”

Minisitiri Gen. Marizamunda yakomeje avuga ko Isi idakeneye amagambo ashingiye ku buhenzanguni cyangwa ay’urwango kuko bibangamira amahoro ndetse bigakongeza ubwicanyi ndengakamere bwibasira abasivili binaganisha ku byaha bya Jenoside.

Yasabye Imiryango Mpuzamahanga kuva mu byo guhangana n’ibibazo by’ako kanya, ahubwo hakitabwa ku bisubizo birambye.

Yanagaragaje ko ibibazo byo kutumvikana kw’ibihugu bikomeye biri mu Kanama gashinzwe Umutekano (UN) bigira ingaruka zikomeye ku ifatwa ry’imyanzuro.

Iyi nama ya UN Peacekeeping Ministerial ni urubuga rukomeye ruhurizwaho ibihugu bigamije kongera kwiyemeza no gutanga umurongo mushya mu bikorwa byo kubungabunga amahoro.

Kugeza ubu, u Rwanda rufite abasirikare 5.900 mu butumwa bw’amahoro bw’Umuryango w’Abibumbye, rukaba ari urwa kabiri mu bihugu bitanga umusanzu n’ingabo nyinshi muri ubwo butumwa, nyuma ya Nepal ifite abasirikare 5.950.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27