Tri-Nation T20 Cup 2022: Uganda yitwaye neza itsinda imikino ibiri

Rwanda 35- 168 Uganda

Tanzania 156-169 Uganda

Taliki 16-12-2022

Rwanda-Uganda (Gahanga-09h30)

Tanzania-Rwanda (Gahanga-13h45)

Ku munsi wa gatatu w’irushanwa “Tri-Nation T20 Cup 2022″ ririmo kubera mu Rwanda, ikipe ya Uganda yitwaye neza itsinda imikino ibiri.

Mu mukino wa mbere iyi kipe ya Uganda yatsinze u Rwanda ku kinyuranyo  cy’amanota 133.

Ikipe ya Uganda ni yo yatangiye ikubita agapira ishaka amanota « Batting » maze mu dupira 120 (20 Overs) itsinda amanota 168 mu gihe abakinnyi 9 ari bo basohowe mu kibuga (9 Wickets).

Mu gice cya kabiri, ikipe y’u Rwanda yasabwaga amanota 169 yatangiye gukubita agapira ishaka amanota « Batting », mu dupira 68 (11,2 Overs), abakinnyi bose b’u Rwanda basohowe mu kibuga bamaze gukora amanota 35.

Umukinnyi  wa Uganda, Bilal Hassan ni we wahawe igihembo cy’uwitwaye neza muri uyu  mukino aho yatsinze amanota 20, asohora abakinnyi 3 b’u Rwanda mu kibuga.

Abakinnyi babiri b’u Rwanda, Ndikubwimana Didier  na Bimenyimana Zappy bagize imvune.

Mu mukino wa kabiri, ikipe ya Uganda  naho yitwaye neza itsinda Tanzania. Muri uyu mukino, Uganda yatangiye ikubita agapira ishaka amanota « Batting » maze mu dupira 120 (20 Overs ) ikora amanota 169 mu gihe abakinnyi 8 ari bo basohowe mu kibuga (8 Wickets).

Mu gice cya kabiri, ikipe ya Tanzania yatangiye gukubita agapira ishaka amanota « Batting » aho yasabwaga 170, mu dupira 120 (20 Overs), ikipe ya Tanzania yakoze amanota 156 mu gihe abakinnyi 9 ari bo basohowe mu kibuga (9 Wickets). Ikipe ya Uganda yegukanye  intsinzi ku kinyuranyo cy’amanota 13.

Muri uyu mukino, Mukasa Roger  ukinira ikipe ya Uganda ni we wegukanye igihembo cy’umukinnyi witwaye neza aho  yakoze amanota 89 mu dupira 62, yakoze amanota 6 inshuro 2 anakora  amanota 4 inshuro 13.

Gahunda y’imikino y’umunsi wa 4

Kuri uyu wa Gatanu taliki 16 Ukuboza 2022, harakinwa imikino  y’umunsi wa 4 y’irushanwa  “Tri-Nation T20 Cup 2022″. Ikipe y’u Rwanda irakina na Uganda i Gahanga (09h30)  nyuma ikipe ya Tanzania ikine n’u Rwanda i Gahanga (13h45).

Iri rushanwa rikaba ryarateguwe  mu rwego rwo gufasha aya makipe kwitegura imikino ya nyuma ku rwego rw’Afurika yo gushaka itike y’igikombe cy’Isi muri 2024 “Africa Regional Finals” izabera muri Namibia mu Kwakira 2023.