Rally: Gomes Leroy yegukanye shampiyona y’Afurika

Gomes Leroy ukomoka muri Zambia ni we wegukanye shampiyona y’Afurika mu gusiganwa mu modoka “FIA African Rally Championship 2022” n’amanota 150 akaba yarahigitse  Karan Patel ukomoka muri Kenya kuko yasoreje ku mwanya wa kabiri n’amanota 135.

Taliki 21 kugeza 23 Ukwakira 2022 muri Zambia ni bwo habaye isiganwa mpuzamahanga rya 6 ku ngengabihe ya shampiyona y’Afurika 2022 “Zambia International Rally 2022”.

Iri siganwa ryagiye kuba n’ubundi Gomes Leroy ari imbere ku rutonde rusange n’amanota 126 aho yasabwaga gusa gusoreza mu  bakinnyi 7 ba mbere  kugira ngo  Karan Patel  wari uri ku mwanya wa kabiri n’amanota 105 naramuka  yegukanye iri rushanwa ntamurushe amanota.

Iri rushanwa “Zambia International Rally 2022” ryegukanwe na Karan Patel aho muri kilometero 234.32 yakoresheje  amasaha 2, iminota 22 n’amasegonda 21. Ku mwanya wa kabiri haje Gomes Leroy wakoresheje amasaha 2, iminota 23 n’amasegonda 23 naho ku mwanya wa 3 haza Essa Mohammed  ukomoka muri Zambia  wakoresheje amasaha 2, iminota 24 n’amasegonda 48.

Karan Patel  akaba ari na we wari wegukanye irushanwa ryo mu Rwanda “Rwanda Mountain Gorilla Rally 2022” ryabaye taliki 23 kugeza 25 Nzeri 2022 bigatuma yegera  Gomes Leroy ku rutonde rusange rwa shampiyona y’Afurika.

Rally: Karan yegukanye RMGR 2022 bimwongerera amahirwe yo kwegukana shampiyona y’Afurika

Nyuma rero yo gusoza aya marushanwa atanga amanota kugira ngo hamenyekane uwegukanye shampiyona y’Afurika,  Gomes Leroy ufatanya n’umugore we, Urshlla Gomes  ni we wegukanye iyi shampiyona y’Afurika n’amanota 150.

Gomes yegukanye irushanwa ryo muri Cote d’Ivoire abona amanota 30  nyuma andi  masiganwa yose uko ari 5 (Kenya, Uganda, Tanzania, Rwanda na Zambia) aba uwa kabiri abona 24 kuri buri siganwa.

Ku mwanya wa kabiri haje  Karan Patel (Kenya) n’amanota 135. Karan yitwaye neza  yegukana isiganwa ryo muri Kenya, Tanzania, u Rwanda na Zambia abona amanota 30 kuri buri siganwa hanyuma aba uwa 6 muri Uganda abona amanota 15. Isiganwa ryo muri Cote d’Ivoire nta bwo yarikinnye.

Umukinnyi ukomoka muri Kenya, Hamza Anwar ni we wasoreje ku mwanya wa gatatu muri shampiyona y’Afurika n’amanota 68.

 Gomes Leroy yegukanye shampiyona y’Afurika ku nshuro ya mbere gusa muri 2017 yahabwaga amahirwe ariko atsindwa na Manvir Baryan ukomoka muri Kenya.

Shampiyona y’Afurika iheruka “FIA African Rally Championship 2021” yegukanwe na Carl Tundo ukomoka muri Kenya.

Kuri ubu, Gomes Leroy  yabaye umukinnyi wa 5 ukomoka muri Zambia wegukanye shampiyona y’Afurika nyuma ya  Satwant Singh wayegukanye inshuro 8 (1988, 1989,1991,1993,1996,1997,1998 na 2000), Muna Singh wayegukanye inshuro 2 (2004 na 2005), Mohamed Essa (2012) na Jassy Singh (2013).

Kuva mu 1981, umukinnyi Luc Requilé  ukomoka mu Bubiligi akaba yarakinaga nk’Umunyarwanda ni we rukumbi wabashije kwegukana shampiyona y’Afurika mu 1985.