Perezida Kagame yitabiriye Inama Mpuzamahanga i Doha muri Qatar

Perezida Kagame yitabiriye Inama Mpuzamahanga i Doha muri Qatar

Perezida wa Repubulika y’u Rwanda Paul Kagame, yageze i Doha muri Qatar aho yifatanyije n’abayobozi bagenzi be mu nama ya 22 y’Ihuriro rya Doha (Doha Forum).

Perezida yagezeyo mu gitondo cyo kuri uyu wa Gatandatu, tariki ya 7 Ukuboza 2024, aho we na bagenzi be bakiriwe na Amiri wa Qatar Sheikh Tamim bin Hamad Al Thani.

Iri huriro rya Doha ry’uyu mwaka, rihuriza hamwe abayobozi bakuru b’Ibihugu na za Guverinoma, abahanga mu nzego zitandukanye, barimo inzego za Leta, abahagarariye Imiryango itari iya Leta, n’abandi bari mu nzego zifata ibyemezo.

Ni inama ifite insanganyamatsiko igira iti: ‘Guhanga udushya ni ihame’.

Ihuriro rya Doha ni umwanya mwiza ku bafatanyabikorwa batandukanye wo kumenya ahari amahirwe mashya mu guhanga udushya twagirira akamaro ahazaza h’Isi, mu rwego rw’umutekano, iterambere rirambye n’uburinganire bwa bose.

Biteganyijwe ko Perezida Kagame aza kwitabira ibirori byo gufungura ku mugaragaro iyo nama, mbere y’uko aza kuba ari umwe mu batanga ikiganiro kiza kuba gifite insanganyamatsiko igira iti: ‘Ihuriro rya Doha n’u Bushinwa bigirira akamaro Isi: Uruhare rw’u Bushinwa mu kuzamura amajyepfo y’Isi: Kuvugurura amategeko ateza imbere ahazaza h’Isi.’

Ibi biganiro bizibanda ku mikoranire hagati y’igice cy’Amajyepfo y’Isi n’u Bushinwa.

Mu bandi baza gutanga ibiganiro harimo Ngalo Mbumba, Perezida wa Namibia, Mia Amor Mottley, Minisitiri w’Intebe wa Barbados, Dr.Eduardo Enrique Garcia, Minisitiri w’Ububanyi n’Amahanga n’Ubutwererane muri Honduras na Dr. Henry Wang, Perezida w’Umuryango Uharanira imikoranire y’u Bushinwa n’Isi (Center for Chana and Globalization).

Ihuriro rya Doha riba rifite intego yo guteza imbere Demokarasi, ibiganiro byubaka no guteza imbere imikoranire, hagamijwe kwimakaza gusangira ibitekerezo no guhuza umugambi kw’inzego zifata ibyemezo n’abandi bafite uruhare mu guteza imbere abaturage.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27