Perezida Kagame yifurije Abayisilamu umunsi mwiza wa Eid el-Adha

Perezida Kagame yifurije Abayisilamu umunsi mwiza wa Eid el-Adha

Perezida Paul Kagame yifurije Abayisilamu bo mu Rwanda n’abandi bo ku Isi Umunsi Mukuru w’Igitambo uzwi nka Eid el-Adha.

Mu Butumwa Umukuru w’Igihugu yanyujije ku mbuga nkoranyambaga ze yagize ati: “Ndifuriza cyane Abayisilamu bose bo mu Rwanda ndetse no ku Isi yose umunsi mwiza wa Eid el-Adha.

Uyu munsi ube umusemburo w’ubumwe, amahoro, imibereho myiza, n’impuhwe muri twese.”

Umunsi Mukuru wa EidAlAdha hazirikanwa igihe Aburahamu yari agiye gutamba umwana we Ismail ho igitambo, ariko Imana ikamuha intama mu cyimbo cy’uwo mwana.

Ni wo munsi mukuru uza ku mwanya wa kabiri mu yizihizwa mu Idini ya Islam nyuma ya Eid al-Fitr.

Umunsi w’igitambo ukorwa mu minsi 3, aho Abayisilamu batamba amatungo bashimira Ingabire zitandukanye Imana yabahaye, bagasangira n’inshuti, abavandimwe n’abakene.

Isengesho ryo kwizihiza Eid Al-Adha ku rwego rw’Igihugu ryabereye kuri Kigali Pele Stadium i Nyamirambo, ryitabirwa n’Abayisilamu benshi.

Mufti w’u Rwanda, Sheikh Sindayigaya Mussa, yavuze ko umunsi wa Eid Al Adha ari umwe mu minsi mikuru ikomeye mu idini ya Islam, aboneraho gusaba Abayisilamu kuwizihiza mu byishimo ndetse barangwa n’urukundo.

Yagize ati: “Igitambo ni inyungu yo kwimakaza urukundo ariko ni n’ifunguro rifasha n’abatishoboye kugira ngo na bo bishimane n’imiryango yabo ku munsi w’ilayidi kuko ari umunsi w’ibyishimo.”

Ni umunsi benshi bita ’Ilayidi’, ubanzirizwa n’isengesho rikurikirwa n’igikorwa cyo kubaga amatungo atangwamo ibitambo, agahabwa abatishoboye.

Igikorwa cyo gutamba cyatangijwe na Mufti w’u Rwanda Sheikh Musa Sindayigaya mu Karere ka Bugesera.

Perezida Paul Kagame yifurije Abayisilamu umunsi mwiza w’Igitambo (Eid el-Adha)
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27