OMS yasabye ibihugu kudaha akato u Rwanda

OMS yasabye ibihugu kudaha akato u Rwanda

Ishami ry’Umuryango w’Abibumbye ryita ku Buzima (WHO/ OMS) ryatangaje ko nta gihugu gikwiye kuba cyaheza u Rwanda kubera icyorezo cya Marburg kuko rwafashe ingamba zihamye zo guhangana nacyo.

Byagarutsweho n’Umuyobozi Mukuru wa OMS, Dr Tedros Adhanom Ghebreyesus mu butumwa yanyujije ku rubuga trwe rwa Twitter.

Yagize ati: “Nta gihugu gikwiye kuba giheza u Rwanda harimo nk’ingamba zo guhagarika ingendo n’ibikorwa by’ubucuruzi kubera Icyorezo cya Marburg kuko ingamba rwafashe zo guhangana na cyo ziri gutanga umusaruro ukwiye.”

Dr Tedros yongeyeho ko icyihutirwa ubu ari ugushyira imbaraga mu bufatanye bugamije gukumira iyi ndwara no kuyirinda abandi, hagendewe ku nama zatanzwe n’inzobere.

Bije bikurikira itangazo ku wa 7 Ukwakira 2024, Minisiteri y’Ububanyi n’Amahanga ya Leta Zunze Ubumwe z’Amerika yashyize hanze  igira abaturage bayo inama yo kutajya mu Rwanda kubera icyorezo cya Marburg cyamaze kuhagaragara.

Bukeye bwaho, Ikigo Gishinzwe Gukumira Indwara z’Ibyorezo muri Leta Zunze Ubumwe za Amerika (CDC) cyahise gitangaza ko abagenzi baturutse mu Rwanda bazajya bapimwa kugira ngo harebwe ko nta bwandu bwa Marburg bafite.

OMS yavuze ko Leta y’u Rwanda yakoze ibishoboka byose mu gukumira iyi ndwara ku buryo buri wese uyifite yamaze kugaragara akaba ari guhabwa ubuvuzi bwihariye, n’abahuye na bo bashakishijwe bashyirwa aho bakurikiranirwa kugira ngo hatabaho gukwirakwiza icyo cyorezo kandi OMS yashimangiye ko nta bimenyetso byerekana ko iyi ndwara ishobora kuba iri gukwirakwira mu gihugu.

Umuyobozi Mukuru wa OMS, Dr Tedros Adhanom Ghebreyesus
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27