RPF-Inkotanyi yasabye urubyiruko gutanga urugero mu kurwanya ibiyobyabwenge

RPF-Inkotanyi yasabye urubyiruko gutanga urugero mu kurwanya ibiyobyabwenge

Umuryango FPR-Inkotanyi usaba urubyiruko gutanga urugero no kuba ku isonga mu kurwanya ibiyobyabwenge, kurinda abana ubusambanyi n’ibindi bikorwa byatuma urubyiruko rwisanga rwagonganye n’amategeko.

Byagarutsweho n’Umuyobozi Mukuru wungirije w’Umuryango FPR-Inkotanyi, Uwimana Consolée, ubwo yatangizaga kumugaragaro Inama Nkuru ya 6 y’Urugaga rw’Urwubyiruko rushamikiye ku Muryango rurenga 2,000, kuri iki Cyumweru tariki 22 Werurwe 2026.

Mu butumwa yageneye urubyiruko, yarusabye guhagurukira guhanga ibishya no gukemura ibibangamiye abaturage. Yagize ati: “Mube ku isonga mu kurwanya ibiyobyabwenge mwirinda guhemuka no kutubahana. Turabasaba kwirinda izi ngeso kuko zangiza ubuzima bwanyu.”

Yibukije ko gusambanya umwana ari icyaha kidasaza bityo ko urubyiruko rukwiye gufatanyiriza hamwe rukarinda abana. Urubyiruko rufite inshingano zo kwirinda icuruzwa ry’ibiyobyabwenge ariko rugashishikarizwa kwiga no kujya mu bikorwa bya Leta. Rufite kandi inshingano zo gusigasira ururimi rw’ikinyarwanda kandi bikaba amahitamo.

Umuryango FPR-Inkotanyi wibutsa ko kugira ngo u Rwanda rukomeze kwamamara mu ruhando mpuzamahanga, rubifitemo uruhare. Ku rundi ruhande, ababyeyi na bo bibukijwe ko bafite inshingano zo kuraga abana babo indangagaciro ariko n’utannye agacyahwa.

Uwimana Consolée, Umuyobozi Mukuru wungirije wa FPR-Inkotanyi, avuga ko ejo hazaza hazubakwa n’urubyiruko arusaba kugira umutima wo kurwanirira igihugu rukoresheje ikoranabuhanga. Muri iyi nama haratorwa komite nyobozi ku rwego rw’Igihugu igomba gukomereza aho iyari isanzweho yari igereje.

Imibare yo mu 2024 igaragaza ko mu Bigo Ngororamuco habarurwamo abagera ku 6,460 bagororerwamo kubera ikoreshwa ry’ibiyobyabwenge, mu gihe ibyaha bijyanye na byo biri mu nkiko bigera ku 4,000, naho buri mwaka abagera ku 5,000 bagana inzego z’ubuzima kugira ngo bahabwe ubuvuzi ku ndwara baba batewe no gukoresha ibiyobyabwenge.

Uwimana Consolée, Umuyobozi Mukuru wungirije w’Umuryango FPR-Inkotanyi
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27