Minisitiri w’Intebe Dr. Nsengiyumva yaganiriye n’abayobozi bashya ba PSF

Minisitiri w’Intebe Dr. Nsengiyumva yaganiriye n’abayobozi bashya ba PSF
Minisitiri w’Intebe n’abayobozi bashya ba PSF baganiriye ku kongera umusaruro no guteza imbere ishoramari mu nzego z’ingenzi z’ubukungu

Minisitiri w’Intebe, Dr. Justin Nsengiyumva yahuye n’abayobozi bashya b’Urugaga rw’Abikorera mu Rwanda (PSF), baganira ku kurushaho gushimangira ubufatanye mu kongera umusaruro no guteza imbere ishoramari mu nzego z’ingenzi z’ubukungu.

Ibi biganiro byabaye kuri uyu wa 9 Mata 2026, ku biro bya Minisitiri w’Intebe. Amatora yo gusimbuza inzego z’ubuyobozi bwa PSF yabaye muri Werurwe 2026, yatorewemo Twagirumukiza François asimbuye Mubiligi Jeanne Françoise.

Twagirumukiza afatanya na Jean Claude Uwizeyemungu nka Visi Perezida wa mbere na Diane Mukasahaha Kamanzi Visi Perezida wa kabiri.

Abikorera bafite uruhare rukomeye mu iterambere ry’u Rwanda binyuze mu ishoramari, guhanga imirimo, no kwishyura imisoro ituma igihugu cyihuta mu bukungu. Binyuze mu Urugaga rw’Abikorera (PSF), bagira uruhare mu kubaka ibikorwa remezo, guteza imbere inganda n’ubucuruzi.

PSF igizwe n’amashami 10 ashingiye ku bucuruzi na serivisi abarimo bakoramo. Yashinzwe mu 1999 ijya mu maboko y’abikorera byuzuye isimbuye iyahoze ari ‘Chambre de Commerce et d’Industrie du Rwanda’ yabarizwaga muri Minisiteri y’Ubucuruzi n’Inganda.

Uru rugaga rufite inzego z’ubuyobozi guhera ku rwego rw’Akagari kugeza ku rwego rw’Igihugu aho rutanga ubuvugizi mu kugabanya imbogamizi z’ubucuruzi.

Itegura imurikagurisha mpuzamahanga, Expo, rihuza abikorera bo mu Rwanda n’abo mu mahanga ndetse ikanavugurura uburyo bw’ubucuruzi.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27