Kenya: Abanyarwanda baserukanye isheja mu birori byo kumurika umuco

Kenya: Abanyarwanda baserukanye isheja mu birori byo kumurika umuco

Abanyarwanda n’inshuti z’u Rwanda basaga 500 bitabiriye ibirori by’umwaka wa 2025 byo kumurika umuco, bagaragaza ubudasa bw’umuco nyarwanda. 

Ibyo birori byabereye ku nyubako ya ‘United Kenya Club’ ku wa Gatandatu tariki ya 11 Ukwakira 2025, aho Abanyarwanda baboneye umwanya uhagije wo kumurika umurage w’umuco ukungahaye, ndetse na serivisi Abanyarwanda batanga muri Kenya. 

Uretse kugaragaza uwo muco, Abanyarwanda bagaragaje ibicuruzwa na serivisi batanga muri icyo gihugu ndetse n’uruhare bagira mu guteza imbere Igihugu cyabo. 

Ambasaderi w’u Rwanda muri Kenya Ernest Rwamucyo, yavuze ko ibyo birori byabaye umwanya mwiza wo kwishimira umurage w’umuco w’u Rwanda, ubumwe ndetse n’ishema Abanyarwanda basangiye. 

Yaboneyeho gushimira Abanyarwanda n’inshuti z’u Rwanda muri Kenya butabiriye ibyo birori. 

Yashimangiye akamaro ko guteza imbere no gusigasira umuco nyarwanda, ahamya ko umuco uzahora ari inkingi ya mwamba iranga ubunyarwanda. 

Umugoroba w’ibyo birori waranzwe no guhemba amakipe ane y’Abanyarwanda akinira mu bice bitandukanye bya Kenya, yitabiriye amarushanwa y’umupira w’amaguru w’abagize Umuryango Nyarwanda muri Kenya ya 2025.

Kenya icumbikiye umubare utubutse w’Abanyarwanda bamaze gutura kandi bafite inzego zibakurikirana. 

Umuryango w’Abanyarwanda baba muri Kenya ugizwe n’abantu benshi bakomoka mu Rwanda bahisemo gutura cyangwa gukorera muri Kenya. 

Ambasade y’u Rwanda muri Kenya ikomeje kongera ubushobozi bwo gutanga serivisi zinoze ku Banyarwanda baba muri Kenya, Somalia na Eritrea. 

Iyo Ambasade kandi ikorana mu buryo bwagutse n’abagize Umuryango w’Abanyarwanda baba muri Diaspora mu ngingo zijyanye n’iterambere ry’u Rwanda nk’Igihugu cyababyaye.  

Abagize Umuryango Nyarwanda muri Kenya na bo bakomeje gutanga umusanzu mu iterambere rya gakondo yabp bonyuze mu gushyigikira gahunda z’igihugu zigamije kwishakamo ibisubizo. 

Muri gahunda bashyigikira harimo iya Girinka igamije korosa Abanyarwanda batishoboye maze bakikura mu bukene, kwishyurira abatishoboye ubwisungane mu kwivuza, kwitabiri Umuganda n’ibindi. 

Amakipe yitabiriye amarushanwa yahembwe
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27