Iyo Abanyarwanda bavuga ko RDF ari yo bakesha kubaho, ibyakira ite?

Iyo Abanyarwanda bavuga ko RDF ari yo bakesha kubaho, ibyakira ite?

Umuvugizi Wungirije w’Ingabo z’u Rwanda (RDF), Lt Col. Simon Kabera, yavuze ko Ingabo z’u Rwanda zishimira kuba hari Abanyarwanda bavuga ko ari zo zabarokoye, zikabaha ubuzima n’umutekano, avuga ko ibyo bibongerera imbaraga zo gukomeza ibikorwa bigamije guteza imbere imibereho y’abaturage.

Yavuze ko RDF izakomeza guharanira ko buri Munyarwanda abaho yishimye kandi atekanye, binyuze mu nshingano zayo zo kurinda igihugu no kugira uruhare mu iterambere. Yagize ati: “Nk’ingabo za RDF biratunezeza, kuko tuba dushyira mu bikorwa icyerekezo cya Nyakubahwa Perezida wa Repubulika y’u Rwanda, Umugaba w’Ikirenga w’Ingabo z’u Rwanda, Paul Kagame.”

Lt. Col. Kabera yavuze ko icyo cyerekezo cyatangiriye mu mwaka wa 1993, ubwo Ingabo za RPA – Inkotanyi zari mu rugamba rwo kubohora igihugu, Perezida Kagame yagaragaje ko izo ngabo zizaba umusingi w’impinduka n’iterambere ry’u Rwanda. Ati: “Mu 1993, i Mukarange, aho Nyakubahwa Perezida wa Repubulika yavuganaga n’ingabo, yavuze ko izi ngabo zizaba umusingi w’impinduka n’iterambere bizaba mu gihugu cyacu.”

Yasobanuye ko itegeko rigenga Ingabo z’u Rwanda riziha inshingano zo kugira uruhare mu bikorwa by’iterambere, ari na yo mpamvu zikomeje kwegera abaturage zibafasha mu mibereho yabo ya buri munsi.

Yavuze ko RDF ishyize imbere ibikorwa biteza imbere abaturage birimo kububakira ibiraro n’inzu, kubagenera amatungo arimo inka n’ihene, ndetse n’ibindi bikorwa remezo bifasha kuzamura imibereho yabo.

Mu mwaka wa 2025/2026, mu bikorwa byo kwegera abaturage byakozwe ku bufatanye bw’Ingabo z’u Rwanda, Polisi y’u Rwanda n’abaturage, hubatswe inzu 80 zigenewe abatishoboye.

Umuvugizi wa Polisi y’u Rwanda yavuze ko ibikorwa bikorwa n’Ingabo na Polisi byunganira gahunda zisanzwe za Leta kandi bikagira uruhare rugaragara mu kuzamura imibereho y’abaturage. Ati: “Umuturage ntabwo yishimira inzu gusa ahubwo yishimira icyo imumariye.”

RDF ikomeje icyerekezo cyo kuba umusingi w’iterambere ikesha Perezida wa Repubulika y’u Rwanda Paul Kagame akaba n’Umugaba w’Ikirenga w’Ingabo z’u Rwanda
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27