Handball:  Gicumbi HBT na Police HBC zigiye guhatanira igikombe cya shampiyona

Mu mpera z’icyumweru gishize taliki 01 kugeza 03 Nyakanga 2022 habaye imikino isoza shampiyona ya Handball “Playoffs 2022” mu cyiciro cya mbere n’icya kabiri mu bagabo.

Mu cyiciro cya mbere, ikipe ya Gicumbi HBT na Police HBC ni zo zizakina imikino ya nyuma  aho ikipe izatsinda imikino 2 muri 3 izahita yegukana igikombe cya shampiyona yaherukaga kuba muri 2019.

Shampiyona y’icyiciro cya mbere mu bagabo “Handball Men’s National League 2022” yatangiye muri Mata 2022 aho amakipe 10  yagabanyijwe mu bice bibiri “League A  na  B”.

Muri “League A” nyuma yo gukina umukino ubanza n’uwo kwishyura, Police HBC yasoje iyoboye urutonde ikurikirwa na ES Kigoma, UR Huye, College S^t Martin Hanika na Munyove HC.

Muri “League B”, Gicumbi  HBT  yasoje ari iya mbere ikurikirwa na APR HBC, ADEGI, Nyakabanda HC na UR Rukara.

Amakipe 3 ya mbere muri buri “League” yahise akomeza  mu mikino ya kamarampaka “Playoffs” aho buri kipe yo muri “League A” yagombaga gukina n’iyo muri “League B”.

Ikipe ya Police HBC ifite igikombe cya shampiyona giheruka muri 2019 yatsinze  ADEGI ibitego 40 kuri 28 inatsinda ikipe ya APR HBC  ibitego 37 kuri 28 nyuma itsindwa na Gicumbi HBT ibitego 34 kuri 26.

Ku ruhande rw’ikipe ya Gicumbi HBT  yari iyoboye urutonde muri “League B” yitwaye neza itsinda UR Huye ibitego 33 kuri 26, itsinda ES Kigoma ibitego 34 kuri 23 inatsinda Police HBC  ibitego 34 kuri 26.

Ikipe ya  APR HBC yari isanzwe ihanganira ibikombe muri iyi mikino nta bwo yitwaye neza kuko  yatsinzwe na UR Huye ibitego 29 kuri 27, itsindwa na Police HBC ibitego 37 kuri 28 inatsindwa na  ES Kigoma ibitego 33 kuri 25.

Amakipe abiri ya nyuma muri buri “League” yarahuye hagati yayo  kugira ngo hamenyekane azamanuka mu cyiciro cya kabiri. Mu mikino yabaye Nyakabanda yatsinze Munyove ibitego 20-0, itsinda College S^t Martin Hanika ibitego 35 kuri 31 inatsinda UR Rukara ibitego 34 kuri 28.

Ikipe ya College S^t Martin Hanika yatsinze Munyove ibitego 20-0 inanganya na UR Rukara ibitego 22-22  naho UR Rukara itsinda Muyove ibitego 20-0.

Nyuma y’iyi mikino ya “Playoffs” hakozwe urutonde aho Gicumbi HBT iyoboye ikurikiwe na Police HBC, ES Kigoma (3), UR Huye (4),  ADEGI (5), APR HBC (6), Nyakabanda HC  (7), College S^t Martin Hanika (8), UR Rukara (9) na Munyove HC (10).

Biteganyijwe ko ikipe ya Gicumbi HBT izakina na  Police HBC  zizatanguranwa gutsinda imikino 2 muri 3, izatsinda imikino  ibiri ikegukana igikombe cya shampiyona. Umukino wa mbere uzakinirwa i Gicumbi ku cyumweru taliki 10 Nyakanga 2022.

Ikipe ya UR Rukara  na Munyove HC zikaba zaramanutse mu cyiciro cya kabiri.

UR Nyarugenge na Vision JN zazamutse mu cyiciro cya mbere

Mu cyiciro cya kabiri mu bagabo naho hitabiriye amakipe 11 agabanywa  mu bice bibiri “League A  na  B”.

Muri “League A” harimo UR Nyarugenge, UR Gikondo, UR Rusizi, Vision JN, UR Remera na UR Busogo aho muri “League B” harimo Gorillas HC, UR Rwamagana, TVET Mutenderi, UR Nyagatare na GS St Aloys .

Nyuma y’imikino ya “Playoffs”, ikipe ya UR Nyarugenge na Vision JN y’i Rubavu ni zo zazamutse mu cyiciro cya mbere.

Ikipe ya UR Nyarugenge  yitwaye neza itsinda Gorillas HBC ibitego 33 kuri 28 itsinda UR Rwamagana ibitego 34 kuri 33 inatsinda TVET Mutenderi ibitego 30  kuri 22.

Ikipe ya Vision JN yatsinze Gorillas HBC  ibitego 30 kuri 40, itsinda TVET Mutenderi  ibitego 39 kuri 30 inatsinda UR Rwamagana ibitego 30 kuri 26.

Mu yindi mikino yabaye, Gorillas HBC yatsinze UR Gikondo ibitego 31 kuri 20, UR Rwamagana itsinda UR Gikondo ibitego 20 kuri 19 mu gihe TVET Mutenderi yatsinze UR Gikondo ibitego 26 kuri 25.

Mu makipe ya nyuma, UR Remera  yatsinze UR Busogo ibitego 29 kuri 26, GS S^t Aloys itsinda UR Busogo ibitego 27 kuri 20 mu gihe UR Remera na UR Rusizi zateye mpaga ikipe ya UR Nyagatare ku bitego 20-0.

Nyuma y’iyi mikino, UR Nyarugenge ni yo iyoboye aho ikurikiwe na Vision JN, Gorillas HBC (3), UR Gikondo (4), TVET Mutenderi (5), UR Rwamagana (6), UR Remera (7), UR Rusizi (8), GS St Aloys (9), UR Busogo (10) na UR Nyagatare (11).

Nubwo UR Nyarugenge na Vision JN zazamutse mu cyiciro cya mbere zigomba guhatanira igikombe aho zizatanguranwa gutsinda imikino ibiri muri itatu. Izatsinda imikino ibiri ni yo izegukana igikombe cya shampiyona ya 2022.