Dushimimana yarahiriye kuyobora Komisiyo y’u Rwanda ishinzwe ivugururwa ry’amategeko

Dushimimana yarahiriye kuyobora Komisiyo y’u Rwanda ishinzwe ivugururwa ry’amategeko

Kuri uyu wa Gatatu tariki ya 30 Nyakanga, Perezida mushya wa Komisiyo y’u Rwanda ishinzwe ivugururwa ry’amategeko, RLRC (Rwanda Law Reform Commission), Claudine Dushimimana yarahiriye kuyobora iyo Komisiyo.

Ni umuhango wabereye ku Rukiko rw’Ikirenga aho wayobowe na Perezida w’urwo Rukiko, Domitilla Mukantaganzwa ndetse witabirwa n’abandi bayobozi batandukanye muri urwo rwego.

Dushimimana wahawe izo nshingano na Perezida wa Repubulika Paul Kagame ku wa 16 Nyakanga 2025, avuga ko ari inshingano zikomeye ariko zidateye ubwoba kandi yiyemeje gukomereza aho abandi bari bageze, hakarebwa uburyo amategeko anozwa ariko bijyanye n’icyerekezo cy’igihugu.

Yagaragaje ko mu nshingano ze agiye kureba amategeko mashya akwiye kujyaho, ayo kuvugurura cyangwa guhindura kandi bijyanye n’icyerekezo cy’igihugu ariko akanamenyekanishwa mu baturage.

Ati: “Tuzarushaho gushyira imbaraga mu kumenyekanisha amategeko Abanyarwanda bose bayamenye kuko ni bo ashyirirwaho. Hazashyirwamo imbaraga mu buryo bw’ikoranabuhanga ku buryo hajyaho aho amategeko ashakirwa ariko hatekerezwa n’uburyo abatabasha kubona interineti bayamenya kuko na bo arabareba.”

Avuga ko nubwo agiye muri iyo Komisiyo ariko asanze hari umusingi washyizweho akaba ari wo agiye gukomerezaho.

Perezida w’Urukiko rw’Ikirenga, Domitilla Mukantaganzwa yamwifurije ishya n’ihirwe mu nshingano nshya ndetse avuga ko inshingano Dushimimana ajemo ari ishakiro ry’amategeko y’I gihugu. 

Ati: ”Iyo nshingano y’agaciro gakomeye ku buzima bw’Igihugu ni yo Dushimimana amaze kurahirira tumuhaye ikaze mu bayobozi b’Inzego z’Ubutabera.”

Dushimimana umaze imyaka 20 mu mategeko, yari asanzwe ari Umushinjacyaha ku rwego rw’Igihugu ndetse anayobora Ishami rishinzwe ibyaha Mpuzamahanga mu Bushinjacyaha Bukuru, akaba n’umwarimu w’amategeko muri Kaminuza ya ILPD.

Uwo muhango witabiriwe na Perezida w’Urukiko rw’Ikirenga, Domitilla Mukantaganzwa n’abandi bakora muri urwo rwego
Claudine Dushimimana yasinye nyuma yo kurahirira inshingano nshya
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27