Cricket: Zonic na Kigali CC zigiye gukina umukino wa nyuma muri “Dafabet RCA T20 League 2022”
-
- Ukwakira 1, 2022
- Hashize imyaka 4
Kuri iki cyumweru taliki 02 Ukwakira 2022 ni bwo hateganyijwe umukino wa nyuma w’irushanwa “Dafabet RCA T20 League 2022” ryahuzaga amakipe yo mu cyiciro cya mbere mu bagabo mu mukino wa Cricket.
Ikipe ya Zonic Tigers CC igomba gukina ku mukino wa nyuma n’ikipe ya Kigali CC yabonye itike yo gukina umukino wa nyuma kuri uyu wa Gatandatu taliki 01 Ukwakira 2022 nyumayo gutsinda ikipe ya Telugu Royals CC .
Muri uyu mukino ikipe ya Telugu Royals CC ni yo yabanje gukubita agapira ishaka amanota “Batting”, mu dupira 103 (17.1 Overs), abakinnyi ba Telugu Royals basohowe mu kibuga (10 Wickets) ubwo iyi kipe yari imaze gukora amanota 81.
Ikipe ya Kigali CC yasabwaga amanota 82 kugira ngo yegukane intsinzi yatangiye gukubita agapira ishaka amanota “Batting” maze mu dupira 48 (8 Overs) ikora amanota 85 mu gihe abakinnyi 4 ari basohowe mu kibuga (4 Wickets).
Muri uyu mukino, Stiven Wambosi ukinira Kigali CC ni we wabaye umukinnyi witwaye neza aho yatsinze amanota 21 mu dupira 12 yakinnye anasohora abakinnyi 2 ba Telugu Royals CC.
Umukino wa nyuma w’irushanwa “Dafabet RCA T20 League 2022” hagati ya Zonic Tigers CC na Kigali CC ukaba uteganyijwe ku munsi w’ejo taliki 02 Ukwakira 2022 guhera saa tatu n’igice za mu gitondo (09h30).
Iri rushanwa ryatangiye taliki 28 Kanama 2022 aho ryateguwe n’ishyirahamwe ry’umukino wa Cricket mu Rwanda “RCA” ku bufatanye n’abaterankunga barimo Dafabet, kompanyi yo mu Buhinde ikora ibijyanye no gutega ku mikino ndetse na Simba Voyages Ltd ikora ibijyanye n’ingendo zo mu kirere.
Iri rushanwa rikaba ryerekanwa ku buryo bw’ikoranabuhanga kugira ngo n’abatabasha kugera ku kibuga babashe gukurikina imikino binyuze kuri “Youtube” ya RCA https://www.youtube.com/channel/UCpiTPH_ZEiS35qQIfqnhtAg cyangwa https://cricheroes.in/tournament/470023/DAFABET-RCA-T20-LEAGUE-2022?#UPCOMING_MATCH
-
- Ukwakira 1, 2022
- Hashize imyaka 4
