Cricket: Tanzania na Kenya zirahatanira igikombe cy’irushanwa ryo Kwibuka

Taliki 18-06-2022

Umwanya wa 3

Rwanda-Uganda (Gahanga-09h30)

Umukino wa nyuma

Kenya-Tanzania (Gahanga-13h30)

Kuri uyu wa Gatandatu taliki 18 Kamena 2022   ni bwo hasozwa imikino  y’irushanwa mpuzamahanga ryo Kwibuka  “Kwibuka Women’s T20I Tournament 2022”  ryatangiye taliki 09 Kamena 2022.

Imikino iteganyijwe, ikipe y’u Rwanda irakina na Uganda zihatanira umwanya wa 3. Uyu mukino urabera kuri Sitade ya Gahanga saa tatu n’igice (09h30).

Izi kipe zari zakinnye mu mikino y’amajonjora aho ikipe ya Uganda yatsinze u Rwanda.

Umukino wo guhatanira igikombe urahuza ikipe ya Tanzania yegukanye iki gikombe muri 2019 na Kenya  ifite iki gikombe giheruka muri 2021. Umukino urabera kuri Sitade ya Gahanga saa saba n’igice (13h30).

Mu mikino y’amajonjora ikipe ya Tanzania ikaba yari yatsinze Kenya  ku kinyuranyo cy’amanota 38.

 Mbere y’iyi mikino y’umunsi wa nyuma, ku wa Gatanu taliki 17 Kamena 2022 habaye imikino ibiri yo guhatanira umwanya wa 5 n’uwa 7.

Mu guhatanira umwanya wa 5, ikipe ya Nigeria yitwaye neza itsinda Brazil. Ikipe ya Nigeria ni yo yatangiye ikubita agapira ishaka amanota “Batting” aho mu dupira 120 (20 Overs) yatsinze amanota 113 mu gihe abakinnyi 4 ari bo bavuye mu kibuga (4 Wickets).

Ikipe ya Brazil yasabwaga amanota 114 yatangiye gukubita agapira  “Batting” maze mu dupira 120 (20 Overs) ikora amanota 83, abakinnyi 7 basohorwa mu kibuga (7 Wickets).

Ikipe ya Nigeria yahise yegukana umwanya wa 5 mu gihe Brazil yafashe umwanya wa 6.

Undi mukino wabaye wahuje ikipe ya Botswana n’u Budage zihatanira umwanya wa 7. Ikipe ya  Botswana ni yo yabanje gukubita agapira ishaka amanota “Batting” maze mu dupira 120 (20 Overs) ikora amanota 107, abakinnyi 4 bava mu kibuga (4 Wickets).

Ikipe y’u Budage  na yo yatangiye gukubita agapira ishaka amanota  “Batting” maze mu dupira 97 (16.1 Overs) ikora amanota 108, abakinnyi 4 basohorwa mu kibuga (4 Wickets).  Ikipe y’u Budage ni yo yahise yegukana umwanya 7 mu gihe Botswana yasoreje ku mwanya wa nyuma wa 8. Iyi kipe n’umwaka ushize wa 2021 na bwo yasoreje ku mwanya wa nyuma wa 5.