Cricket : Mu Rwanda hagiye kubera irushanwa “East Africa T20I Series 2022”

Kuva taliki 13 kugeza 24 Ukuboza 2022, u Rwanda ruzakira irushanwa mpuzamahanga rigiye kuba ku nshuro ya mbere rihuza amakipe yo muri aka karere k’Afurika y’Iburasirazuba  mu bagabo  “East Africa T20I Series 2022”.

Iri rushanwa rizahuza amakipe 4 ari yo u Rwanda, Kenya, Uganda na Tanzania.  Aya makipe azakina  hagati yayo  aho ikipe izakina n’indi imikino 3  kuva taliki 13 kugeza 22 Ukubona 2022 naho taliki 24 Ukubona 2022 habe imikino ya nyuma aho ikipe ya mbere n’iya kabiri zizahatanira igikombe naho iya gatatu n’iya kane zihatanire umwanya wa 3.

Iri rushanwa rikaba rizafasha aya makipe kwitegura imikino ya nyuma yo gushaka itike y’igikombe cy’Isi  “Africa Regional Finals” rizabera muri Namibia mu Kwakira 2023. Kugeza ubu ikipe y’u Rwanda na Kenya ndetse na Uganda zamaze kubona itike naho Tanzania iri mu mikino yo gushaka itike irimo kubera mu Rwanda kuva taliki 01 Ukuboza 2022.

Perezida w’ishyirahamwe ry’umukino wa Cricket mu Rwanda “RCA”, Musaale Stephen yatangaje ko iri rushanwa rizafasha ikipe y’u Rwanda kwitegura imikino yo mu Kwakira 2023.

Akomeza avuga ko ubu u Rwanda ruri ku mwanya wa 65 ku Isi  kandi bihaye intego ko mu myaka 5 ruzaba ruri mu bihugu 40 bya mbere ku Isi.

Ati : “Nkurikije uko turimo kwitwara uyu mwanya tuzawugeraho vuba nko mu myaka 3  kuko turimo gutsinda amakipe aturi imbere.”

Mu mikino yo gushaka itike y’igikombe cy’Isi mu itsinda A, ikipe y’u Rwanda yatsinze Botswana iri ku mwanya wa 47 na Malawi iri ku mwanya wa 52.

Ati : “ Buriya muri Mutarama 2023 hari ikizahinduka tuzamuke ku rutonde”.

Agaruka kuri iri rushanwa rigiye kuba ku nshuro ya mbere, Perezida wa RCA, Musaale Stephen yatangaje ko batangije irushanwa ryo kwibuka mu bagore hitabira ibihugu  byo muri aka Karere ariko ubu rimaze gukomera ku buryo amakipe  yo hirya no hino ku Isi  aba yifuza kuryitabira.

Ati : “Iri na ryo tugiye kuritangira nkuko twatangiye iryo Kwibuka bizarangira ribaye irushanwa mpuzamahanga rikomeye ku buryo  ibihugu bikomeye bizajya bisaba kuza kuryitabira.”

Perezida wa RCA, Musaale ashimangira ko bamaze kugira ubunararibonye mu gutegura amarushanwa nk’aya mpuzamahanga kuko ikibuga n’ibindi byose bikenerwa birahari ndetse n’imikoranire y’inzego zitandukanye zirimo MINISPORTS, Immigration, RDB, RCB, RBC, Polisi y’igihugu n’abandi.

Akomeza avuga ko  iyo ikipe igeze mu Rwanda ku kibuga cy’indege idashobora kumara iminota irenze 15 nyamara hari aho bajya mu mikino ugasanga bamaze amasaha arenga 3 ku kibuga cy’indege.  Ati : “ Iyo amakipe ageze inaha Polisi irayaherekeza ikayageza kuri Hoteli mu mutekano usesuye.”

Uyu muyobozi akaba abona umukino wa Cricket nubwo utaramara igihe kinini utangiye gukinwa mu Rwanda  dore ko umaze imyaka 22 ariko urimo gutera imbere cyane akaba anashishikariza abakiri bato kuwitabira.