Cricket: Ishimwe yahawe igihembo nk’umukinnyi witwaye neza muri Werurwe 2023
-
- Mata 12, 2023
- Hashize imyaka 3
Ishimwe Henriette ukinira ikipe y’igihugu y’ u Rwanda akaba na kapiteni w’ikipe ya Indatwa Hampshire CC mu cyiciro cya mbere yahawe igihembo n’ishyirahamwe mpuzamahanga ry’umukino wa Cricket “ICC” nk’uwitwaye neza muri Werurwe 2023 “ICC Women’s Player of the Month for March 2023”.
Taliki 12 Mata 2023 ni bwo ICC yatangaje ko Ishimwe Henriette ari we wegukanye igihembo.
Uyu mukinnyi ufite imyaka 19 umaze iminsi yitwara neza mu mikino mpuzamahanga, yabonye iki gihembo ahigitse abakinnyi babiri bakomoka muri Papua New Guinea ari bo Sibona Jimmy na Ravini Oa.
Taliki 06 Mata 2023 akaba ari bwo hari hatangajwe abakinnyi 3 bagomba guhatanira igihembo.
Ishimwe kuri ubu amaze gukina imikino igera muri 50 akaba aherutse gufasha ikipe y’u Rwanda kwegukana umwanya wa kabiri aho yatsindiwe ku mukino wa nyuma mu irushanwa mpuzamahanga ryabereye muri Nigeria “NCF Women’s T20 International Cricket Tournament 2023” kuva taliki 27 Werurwe kugeza 02 Mata 2023.
Muri iri rushanwa, ku mukino wa Ghana, Ishimwe yatsinze amanota 32 mu dupira 22 anasohora mu kibuga abakinnyi 4. Ku mukino w’u Rwanda na Cameroun yatsinze amanota 43 mu dupira 33, asohora mu kibuga abakinnyi 5. Muri iyi mikino yombi yahawe igihembo cy’umukinnyi witwaye neza mu mukino.
Nyuma yo guhabwa iki gihembo, Ishimwe Henriette yatangaje ko yishimiye igihembo yahawe bitewe n’uko yitwaye mu kwezi gushize kwa Werurwe 2023.
Akomeza avuga ko kwegukana iki gihembo abikesha abantu benshi bamufashije mu rugendo rwo gukina umukino wa Cricket barimo abatoza, bagenzi be bakinana kuko bamuteye imbaraga zo gukora cyane no kwitwara neza.
Yashimiye kandi umuryango we n’inshuti ze bamuhora hafi ndetse anashima Imana yamushoboje ibi byose.
Ishimwe Henriette avuga ko agiye gukomeza gutanga umusanzu we mu iterambere ry’umukino wa Cricket ku rwego mpuzamahanga ndetse no gufasha igihugu cy’u Rwanda gutsinda imikino myinshi mpuzamahanga.
Ishimwe watangiriye gukina umukino wa Cricket i Ndera mu Karere ka Gasabo yari mu ikipe y’u Rwanda y’abakobwa batarengeje imyaka 19 yakoze amateka ikabona itike y’igikombe cy’ Isi 2023 “ICC U-19 Women’s T20 World Cup 2023”, aho imikino yabereye muri Afurika y’Epfo kuva taliki 14 kugeza 29 Mutarama 2023. Ikipe y’u Rwanda yitwaye neza isoreza ku mwanya wa 8 mu makipe 16 yitabiriye aho yatsinze imikino 3 muri 5 yakinnye. Ikipe y’u Rwanda yatsinze Zimbabwe na West Indies.
Mu bagabo iki gihembo cyahawe, Shakib Al Hasan akaba ari kapiteni w’ikipe y’igihugu ya Bangladesh. Uyu mukinnyi ufite imyaka 36 y’amavuko yari ahanganiye iki gihembo na Kane Williamson (New Zealand na Asif Khan (UAE).
-
- Mata 12, 2023
- Hashize imyaka 3
