Cricket : IPRC Kigali yegukanye  “Dafabet RCA T10 Men’s Tournament 2023”

IPRC Kigali 82-71 Challengers CC

Ikipe ya IPRC Kigali CC ni yo yegukanye irushanwa “Dafabet RCA T10 Men’s Tournament 2023” ryateguwe n’ishyirahamwe ry’umukino wa Cricket mu Rwanda “RCA” ku bufatanye na Dafabet.

Iyi kipe yegukanye igikombe nyuma yo gutsindira ku mukino wa nyuma Challengers CC, umukino wabereye kuri Sitade Mpuzamahanga  i Gahanga  taliki 15 Mata 2023.

Iri rushanwa ryari ryitabiriwe n’amakipe  6 asanzwe akina shampiyona y’icyiciro cya mbere mu bagabo ari yo Challengers CC, Right Guards CC,  Zonic Tigers CC,  Kigali CC, Telugu Royals CC na IPRC Kigali CC. Aya makipe akaba yarakinnye  hagati yayo kuva taliki 18 Werurwe kugeza 02 Mata 2023.

Nyuma y’iyi  mikino y’amajonjora, ikipe ya Challengers CC yasoje ifite amanota 10 iyoboye urutonde ikurikiwe na IPRC Kigali CC n’amanota 6.

Aya makipe yombi akaba yaragombaga gukina umukino wa nyuma kugira ngo hamenyekane ikipe itwara igikombe.

Muri uyu mukino wa nyuma, ikipe ya IPRC Kigali CC ni yo yatangiye ikubita agapira ishaka amanota “Batting” maze mu dupira 60 (10 Overs) ikora amanota 82 mu gihe abakinnyi 4 ari bo basohowe mu kibuga.

Mu gice cya kabiri, ikipe ya Challengers CC yasabwaga amanota 83 ngo yegukane intsinzi  yatangiye gukubira agapira “Batting” maze mu dupira 60 (10 Overs) ikora amanota 71 mu gihe abakinnyi 7 ari bo basohowe mu kibuga.

Ikipe ya IPRC Kigali CC ikaba yarahise yegukana intsinzi ku kinyuranyo cy’amanota 11.

Mu mukino w’amajonjora wari wahuje aya makipe yombi, Challengers CC yari yatsinze IPRC Kigali CC ku kinyuranyo cy’amanota 19.

Iyi kipe ya IPRC Kigali CC iri ni ryo rushanwa rya mbere yari ikinnye mu cyiciro cya mbere kuko yazamutse uyu mwaka.

Umutoza mukuru wa IPRC Kigali CC, Nzayisenga Jackson avuga ko uku kwitwara neza babikesha kuba abakinnyi  bamaranye igihe bari kumwe kandi bakaba banafite ikibuga bitorezaho. Akomeza avuga ko iki gikombe ari intangiriro nziza mu ntego zabazanye mu cyiciro cya mbere.

Ibihembo byatanzwe

Abakinnyi bitwaye neza bahawe ibihembo ku giti cyabo. Aba barimo Manishimwe Oscar (IPRC Kigali CC) warushije abandi mu gukubita agapira “Best Batter” akaba yaratsinze amanota  131 mu mikino 5.  Manishimwe yahawe ibihumbi 70.

Igihembo  cy’umukinnyi wateye neza agapira kurusha abandi “Best Bowler” cyahawe  Iradukunda Jean Michel (IPRC Kigali CC) akaba mu mikino  yarakuye mu kibuga abakinnyi 10.  Iradukunda na we yahawe ibihumbi 70.

Umukinnyi, Hamz Khan (Kigali CC) ni we wahawe igihembo cy’uwarushije abandi gutsinda amanota 6 inshuro nyinshi “Top Six Hitter”. Yatsinze amanota 6 inshuro 7. Yahawe ibihumbi 50.

Ndikubwimana Didier (Challengers CC) yahawe igihembo cy’uwakinnye neza mu kibuga “Best Fielder” aho yakuyemo abakinnyi 9 mu mikino 6. Yahawe ibihumbi 50.

Umukinnyi witwaye neza mu irushanwa ryose “Player of the Tournament” ni Akayezu Martin ukinira  Zonic Tigers CC  akaba yarahawe ibihumbi 100.

Ikipe ya IPRC Kigali CC yahawe igikombe n’ibihumbi 500 naho ikipe ya Challengers CC yabaye iya kabiri ihabwa ibihumbi 250.

Umuyobozi ushinzwe ibikorwa muri RCA, Byiringiro Emmanuel yagaragaje ko irushanwa ryagenze neza kandi ryagaragaje ko hari icyizere cy’iterambere ry’umukino wa Cricket kuko ikipe yaryegukanye igizwe n’abakinnyi bakiri bato.