Cricket: Challengers CC ni yo iyoboye urutonde muri “Dafabet RCA T20 League 2022”

Nyuma y’imikino y’umunsi wa 4 mu irushanwa “Dafabet RCA T20 League 2022”, ikipe ya  Challengers CC ni yo iyoboye urutonde by’agateganyo.

Iri rushanwa rihuza amakipe yo mu cyiciro cya mbere mu bagabo mu mukino wa Cricket  “Dafabet RCA T20 League 2022” ryatangiye  taliki 28 Kanama 2022 ku kibuga mpuzamahanga cya Gahanga aho ryateguwe n’ishyirahamwe ry’umukino wa Cricket mu Rwanda “RCA”  ku bufatanye n’abaterankunga barimo Dafabet, kompanyi yo mu Buhinde ikora ibijyanye no gutega ku mikino ndetse na  Simba Voyages Ltd ikora ibijyanye n’ingendo zo mu kirere.

Mu mpera z’icyumweru gishize taliki 17 na 18 Nzeri 2022 habaye imikino y’umunsi wa 4.

Taliki 17 Nzeri 2022, ikipe ya Zonic Tigers yatsinze  Telugu Royals  ku kinyuranyo cy’amanota 31. Ikipe ya Zonic Tigers ni yo yabanje gukubita agapira ishaka amanota “Batting” maze mu dupira 120 (20 Overs) ikora amanota 164. Ikipe ya Telugu Royals   yasabwaga amanota 165  na yo yatangiye gukubita agapira ishaka amanota “Batting” maze mu dupira 120 (20 Overs) ikora amanota 133.

Akayezu Martin ukinira ikipe ya Zonic Tigers, ni we wabaye umukinnyi witwaye neza muri uyu mukino.

Indi mikino ibiri yabaye taliki 18 Nzeri 2022 aho ikipe ya ikipe ya Kutchi Tigers CC  yakinnye  na Kigali CC naho ikipe ya  Telugu Royals  ikina na Challengers CC.

Ikipe ya Kutchi Tigers CC yatangiye  gukubita agapira ishaka amanota “Batting” maze mu dupira 120 ( 20 Overs) ikora amanota 149, abakinnyi  8 basohorwa mu kibuga (8 Wickets).

Ikipe Kigali CC yasabwaga amanota 150  yatangiye  gukubita agapira ishaka amanota “Batting”, ubwo hari hamaze gukinwa udupira 98 (16.2 Overs) abakinnyi 10 basohowe mu kibuga (10 Wickets)  mu gihe iyi kipe  yari imaze gukora amanota 96. Iyi kipe ya Kutchi Tigers  yahise yegukana intsinzi ku kinyuranyo cy’amanota 53.

Chintan Kerai ukinira ikipe ya Kutchi Tigers CC ni we watowe nk’ umukinnyi witwaye neza muri  uyu mukino.

Umukino wasoje iy’umunsi wa 4 wahuje ikipe Challengers CC na  Telugu Royals CC. Iyi kipe ya Telugu Royals CC ni yo yatangiye ikubita agapira ishaka amanota  « Batting » maze mu dupira 71 (11.5 Overs) abakinnyi 10 bakuwe mu kibuga (10 Wickets) ubwo iyi kipe yari imaze gukora amanota 56.

Ikipe ya Challengers CC yasabwaga amanota 57 yatangiye gukubita agapira ishaka amanota “Batting” maze  mu dupira 45 (7.3 Overs)  ikora amanota 58 ihita yegukana intsinzi.

Muri uyu mukino Zephaniah Arinaitwe ukinira ikipe ya Challengers CC ni we wabaye umukinnyi witwaye neza.

Nyuma y’imikino y’umunsi wa 4, ikipe ya Challengers CC ni yo iyoboye n’amanota 6 ikurikiwe na Kigali CC ifite na yo amanota 6, ku mwanya wa 3 hari ikipe ya Zonic Tigers CC n’amanota 4 inganya na Kutchi Tigers CC iri ku mwanya wa 4. Ku mwanya wa 5 hari ikipe ya Telugu Royals CC ifite amanota 2 na ho ku mwanya wa nyuma wa 6 hari Spartans CC kugeza ubu  nta nota na rimwe ifite.

Ku ruhande rw’abakinnyi, Hamza Khan ukinira ikipe ya Kigali CC ni we uyoboye abandi mu bamaze gukora amanota menshi aho afite 119  mu mikino 4  akurikiwe na Ndikubwimana Didier ukinira Challengers CC ufite amanota 183.

Chitan Kerai ukinira Kutchi Tigers CC ni we uyoboye urutonde rw’abamaze gukura abakinnyi benshi mu kibuga (Wickets 7) mu mikino 3. Akurikiwe na Penkaj Vekaria  nawe ukinira Kutchi Tigers CC umaze gukuramo 6 ( Wickets 6) mu mikino 4.

Hamza Khan ukinira Kigali CC ni we wa mbere mu gukina mu kibuga “Best Fielder” aho yabashije gusama udupira 5. Ku mwanya wa kabiri hari Yashasui Josi ukinira Kutchi Tigers CC  wafashe 3.

Imikino izakomeza mu mpera z’iki cyumweru

Imikino y’ irushanwa “Dafabet RCA T20 League 2022” izakomeza taliki 24 na 25 Nzeri 2022.  Taliki 24 Nzeri 2022 hateganyijwe umukino umwe ugomba  guhuza ikipe ya Zonic Tigers  CC na Kutchi Tigers CC (13h30). Taliki 25 Nzeri 2022, ikipe ya Zonic Tigers CC izakina na Challengers CC (09h30)  naho ikipe ya Telugu Royals CC ikine na Kigali CC (13h30). Imikino yose izabera kuri Sitade mpuzamahanga ya Gahanga.

Iri rushanwa rikaba ryerekanwa ku buryo bw’ikoranabuhanga kugira ngo n’abatabasha kugera ku kibuga babashe gukurikina imikino binyuze kuri “Youtube” ya RCA  https://www.youtube.com/channel/UCpiTPH_ZEiS35qQIfqnhtAg cyangwa https://cricheroes.in/tournament/470023/DAFABET-RCA-T20-LEAGUE-2022?#UPCOMING_MATCH