CG Namuhoranye ari mu ruzinduko rw’akazi muri Qatar

CG Namuhoranye ari mu ruzinduko rw’akazi muri Qatar

Umuyobozi Mukuru wa Polisi y’u Rwanda CG Felix Namuhoranye, n’itsinda ayoboye bari mu ruzinduko rw’akazi rw’iminsi itatu muri Qatar.

Yitabiriye umuhango wo gusoza amahugurwa, kuri ba ofisiye bato wabereye muri Qatar Police Academy mu Mujyi wa Doha wayobowe na nyiricyubahiro Amir Sheikh Tamim Bin Hamad Al-Thani, Perizida wa Qatar.

Kandi yagiranye ibiganiro na mugenzi we Major General Mohammed Jassim Al-Sulaiti, Umuyobozi Mukuru w’umutekano w’abaturage. Yanasuye ishuri ryigisha ubutabazi bw’ibanze n’ibikorwa by’ubutabazi.

Polisi y’u Rwanda n’iya Qatar bisanzwe bibanye neza mu mwaka ushize wa 2024, Polisi y’u Rwanda n’Urwego rushinzwe Umutekano muri Qatar (Lekhwiya), byasinyanye amasezerano y’ubufatanye akubiyemo ingamba z’ubufatanye hagati y’inzego zombi mu byerekeranye no gusangira ubunararibonye mu bikorwa byo gucunga umutekano no guhugura abashinzwe umutekano.

Aya masezerano yashyizweho umukono n’Umuyobozi Mukuru Wungirije wa Polisi y’u Rwanda, CP Vincent Sano na Maj. Gen Hamad Hassan Al Sulait ku ruhande rwa Lekhwiya.

Minisitiri w’Umutekano w’Imbere mu Gihugu Dr. Vincent Biruta n’Umuyobozi Mukuru wa Polisi y’u Rwanda Wungirije ushinzwe Ibikorwa DIGP Sano Vincent, icyo gihe na bwo bari mu ruzinduko rw’akazi mu Mujyi wa Doha muri Qatar, aho bitabiriye imurikabikorwa n’inteko y’uyu mwaka ihuriza hamwe inzego zishinzwe umutekano n’ituze rusange ‘Milipol Qatar 2024’.

Tariki ya 29 Ukwakira 2024, ni bwo Minisitiri Dr Biruta Vincent, yagiranye ibiganiro na mugenzi we wa Qatar, ari na we uyobora Urwego rushinzwe Umutekano w’Imbere muri icyo gihugu (Lekhwiya), Sheikh Khalifa bin Hamad bin Khalifa Al Thani.

Ibiganiro bagiranye byagarutse ku bufatanye busanzweho hagati y’ibihugu byombi, mu bijyanye n’umutekano n’ingamba zo kurushaho kunoza umubano.

Aba bayobozi bombi kandi bahagarikiye umuhango wo gusinya amasezerano y’ubufatanye hagati ya Polisi y’u Rwanda n’Urwego rushinzwe Umutekano muri Qatar, agamije kongerera imbaraga, n’ubufatanye busanzweho n’inyungu zihuriweho hagati y’ibihugu byombi.

Ni amasezerano akubiyemo ingamba z’ubufatanye hagati y’inzego zombi mu byerekeranye no gusangira ubunararibonye mu bikorwa byo gucunga umutekano n’uburyo bwo guhugura abashinzwe umutekano.

Impande zombi zemeranyije kurushaho guteza imbere ubufatanye no kongera ubumenyi mu bijyanye n’ikoranabuhanga rigezweho.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27