Basketball: Umwaka w’imikino 2021-2022 wasojwe mu birori

Nyuma y’aho  shampiyona ya Basketball mu bagabo n’abagore isojwe taliki 18 Nzeri 2022 aho ikipe ya REG BBC  yegukanye igikombe mu byiciro byombi, taliki 24 Nzeri 2022  ni bwo hasojwe  umwaka w’imikino muri Basketball “Rwanda Basketball League 2021-2022” mu birori birimo umukino w’abitwaye neza “All Star Game” ndetse n’igitaramo cyari cyatumiwemo   Sauti Sol n’abandi bahanzi bo mu Rwanda.

Mbere y’uko haba umukino w’abitwaye neza mu bagabo “All Star Game” habaye kurushanwa mu gutsinda amanota 3 ahari hahanganye abakinnyi  batandukanye barimo  Uwitonze Justin (IPRC Kigali), Sangwe Armel (APR BBC), Tuyishemeze Dieudonne (IPRC Huye), Ndizeye Ndayisaba Dieudonne (Patriots BBC), Munyeshuri Thierry (Espoir BBC) na Aganze B. Espoir (UGB).

Muri iki cyiciro, Ndizeye Ndayisaba Dieudonne ukinira ikipe ya Patriots BBC ni we witwaye neza.

Mu kurushanwa gutsinda bakoze mu nkangara “Slam Dunk” abakinnyi  barushanyijwe barimo Ndayizeye Samuel (Kigali Titans), Ngendahimana Ngabo Rachid (UR Huye), Irakoze Jules (IPRC Huye), Cleveland Thomas Jr (REG BBC), Mbanze Bryan (IPRC Huye), Kamndoh Betoudji Frank (Shoot for Stars) na Pierre Steven (APR BBC).

Cleveland Thomas Jr ukinira ikipe ya REG BBC ni we wahize abandi muri iki cyiciro.

Umukino w’abitwaye neza “All Star Game”

Uyu mukino wahuje amakipe abiri yatoranyijwe mu  bakinnyi bitwaye neza muri shampiyona mu makipe atandukanye.

Ikipe ya mbere “Team Mpoyo” yari igizwe na Mpoyo Axel (Kapiteni), Gray Kendal, Filer Javon  Adonis, Thomas Jr Cleveland, Nshobozwabyosenumukiza Jean Jacques Wilson, Shyaka Olivier, Sangwe Armel, Kaje Elie, Niyonkuru Pascal, Nkusi Arnaud, Kabare Hubert, Munyeshuri  Thierry. Umutoza ari Ogolla Benson Oluoch  yungirijwe na Atobrihan Fenan.

Ikipe ya kabiri “Team Steve” yari igizwe na  Hagumintwali Steve (Kapiteni),  Ndizeye Ndayisaba Dieudonne,  Habimana Ntore,  Pierre Steven,  Beleck Bell Engelbert,  Wamukotah Bush,  Uwitonze Justin, Kubwimana Kazingufu Ally,  Aganze B. Espoir,  Kamndoh Betoudji Frank,  Muteba Tresor na Turatsinze Olivier. Umutoza ni  Henry Mwinuka Denis Newton  yungirijwe na Karemera Jean Claude.

Muri uyu mukino, Team Mpoyo yatsinze Team Steve amanota 126 ku 116. Agace ka mbere Team Steve yatsinze amanota 34 kuri 26. Agace ka kabiri, Team Mpoyo yatsinze amanota 41 kuri 20, agace ka gatatu, Team Steve yatsinze amanota 31 kuri 20 naho agace ka nyuma ka kane, Team Mpoyo itsinda amanota 39 kuri 31.

Gray Kendall usanzwe akinira ikipe ya Patriots BBC akaba yari muri Team Mpoyo ni we witwaye neza aho yatsinze amanota menshi (29) agarura imipira 14 itageze mu nkangara ndetse anatanga imipira 3 yavuyemo amanota.

Uyu mukino wakurikiranwe na Madamu Jeannette Kagame ari kumwe na Minisitiri wa Siporo, Munyangaju Aurore Mimosa.

It was all fun!

Yesterday, First Lady Mrs Jeannette Kagame attended the RBL ALL STAR GAME 2022, joining fans and lovers of the game of Basketball.#RBLALLSTARGAME22 pic.twitter.com/zWCOrhur2s

— First Lady of Rwanda (@FirstLadyRwanda) September 25, 2022

Abitwaye neza muri shampiyona 2021-2022 bahawe ibihembo

Mu bakowa, uwatsinze amanota 3 kurusha abandi ni Micomyiza Rosine (The Hoops). Uwatsinze amanota menshi ni Mireille Nyota Muganza (REG BBC), uwugariye kurusha abandi ni Umugwaneza Charlotte (APR BBC). Umukinnyi wazamuye urwego kurusha abandi ni Dusabe Jane (The Hoops). Naho umukinnyi witwaye neza kurusha abandi “MVP” aba  Mireille Nyota Muganza (REG BBC).

Hatowe n’ikipe y’umwaka igizwe na Nsanzabaganwa Nelly (APR BBC), Kantore Sandra (REG BBC), Nezerwa Ines (REG BBC), Betty Kalanga (APR BBC) na Mireille Nyota Muganza (REG BBC). Umutoza witwaye neza aba Mukaneza Esperance (REG BBC).

Mu bagabo hahembwe, Munyeshuri Thierry (Espoir BBC) nk’uwatsinze amanota 3 kurusha abandi. Frank Betoudji Kamndoh (Shooting for the Stars)  yabonye igihembo cy’uwatsinze amanota menshi ndetse n’igihembo cy’uwarushije abandi mu kugarira. Umukinnyi wazamuye urwego kurusha abandi ni Turatsinze Olivier  (IPRC Kigali) naho umukinnyi witwaye neza kurusha abandi “MVP” ni Axel Mpoyo (REG BBC).

Hatowe n’ikipe y’umwaka igizwe na Adonis Filer (REG BBC), Kenneth Gasana (Patriots BBC), Hagumintwari Steve (Patriots BBC), Axel Mpoyo (REG BBC) na Pitchou Manga (REG BBC).  Umutoza witwaye neza ni Mwinuka Henry Dennis Newton (REG BBC).

Sauti Sol yasusurukije abitabiriye uyu munsi

Abahanzi babiri, Ish Kevin na Christopher Muneza nibo babanje gususurutsa abitabiriye ibirori byo gusoza umwaka w’imikino muri Basketball nyuma hajyaho Sauti Sol ifite abakunzi benshi mu Rwanda.