Basketball:  Patriots BBC yageze ku mukino wa nyuma wa “Playoffs 2022”

Ikipe ya Patriots BBC iheruka igikombe cya shampiyona muri 2020  yitwaye neza mu mikino  ya ½   ya “Playoffs 2022” mu bagabo  itsinda ikipe ya Tigers BBC imikino 2-0 ihita ikatisha itike yo gukina umukino wa nyuma.

Nyuma y’imikino ya shampiyona , ikipe ya Patriots BBC yasoje iyoboye aho yari ikurikiwe na REG BBC,  APR BBC na Tigers BBC.

Mu mikino  ya “Playoffs 2022” , ikipe ya Patriots BBC yagombaga gukina na Tigers BBC naho REG BBC igakina na APR BBC zitanguranwa gutsinda imikino ibiri muri itatu.

Iyi mikino yabaye mu mpera z’icyumweru gishize taliki 26 na 28 Kanama 2022. Ikipe ya Patriots BBC yatsinze Tigers BBC umukino wa mbere ku  manota 91 kuri 45 naho umukino wa kabiri, Patriots BBC itsinda  amanota 73 kuri 51.

Ku ruhande rwa REG BBC ifite igikombe cya shampiyona giheruka nta bwo yahise igera ku mukino wa nyuma kuko  yatsinze APR BBC ku mukino wa mbere amanota 85 kuri 47 naho umukino wa  kabiri ikipe ya APR BBC iyitsinda ku manota 68 kuri 59.

Nyuma yo kunganya umukino 1-1, taliki 31 Kanama 2022, aya makipe yombi, REG BBC na APR BBC agomba kwisobanura  agakina umukino wa gatatu  hakamenyekana ikipe izasanga Patriots BBC  ku mukino wa nyuma.

Mu bagore, ikipe ya  REG BBC na APR BBC ni zo zizakina umukino wa nyuma. Aya makipe yabigezeho nyuma  yo kwitwara neza muri ½.

Ikipe ya REG BBC yasezereye  The Hoops iyitsinze imikino 2-0. Umukino wa mbere REG BBC yatsinze The Hoops   amanota  71 kuri 47 naho umukino wa kabiri  REG BBC itsinda The Hoops amanota 90 kuri 34.

Ikipe ya APR BBC na yo yageze ku mukino wa nyuma itsinze IPRC Huye imikino 2-0. Umukino wa mbere, APR BBC yatsinze IPRC Huye amanota 69 kuri 56  naho umukino wa kabiri,  APR BBC itsinda IPRC Huye amanota 79 kuri 70.

Biteganyijwe ko imikino ya nyuma izatangira taliki 07 Nzeri 2022 muri BK Arena. Ikipe izegukana igikombe ni izabasha gutsinda imikino 3 muri 5.

Ikipe ya REG BBC mu bagabo n’abagore ni yo yegukanye shampiyona y’icyiciro cya mbere umwaka ushize wa 2020-2021.