Basketball: Irushanwa “Legacy Tournament 2022” rirakomeje

Ikipe ya UGB ku bufatanye n’ishyirahamwe ry’umukino wa Basketball mu Rwanda “FERWABA” yateguye irushanwa ku nshuro ya gatatu “Legacy Tournament  2022” mu rwego rwo kuzirikana abashinze iyi kipe.

Iri rushanwa  rigomba gukinwa mu byiciro bibiri, taliki 21 na 22 Ukwakira 2022 habaye irushanwa ry’amakipe  y’imbere mu gihugu mu cyiciro cya mbere mu  bagabo  ndetse no mu bakanyujijeho.

Mu mikino yabaye mu makipe yo mu cyiciro cya mbere, ikipe ya UGB yatsinze Espoir BBC amanota 66 kuri 62 mu mukino wa kabiri Espoir BBC itsinda  UGB amanota 66 kuri 64.

Mu itsinda B, ikipe ya Shoot 4 the Stars yatsinze APR BBC imikino yombi,  amanota 78 kuri 70 mu mukino wa mbere  ndetse 69 kuri 66 ku mukino wa kabiri. Mu bakanyujijeho, ikipe ya UGB yatsinze CSK  amanota 76 kuri 70.

Hagiye gutangira imikino yo ku rwego mpuzamahanga

Kuva kuri uyu wa Gatatu taliki  26 kugeza 29 Ukwakira 2022 ni bwo irushanwa “Legacy Tournament  2022” rizasozwa haba  imikino mpuzamahanga mu makipe y’icyiciro cya mbere mu bagabo, mu bagore ndetse no mu bakanyujijeho mu bagabo.

Hari kandi n’imikino igomba guhuza amashuri ahazitabira amakipe 4 ari yo CSA, IFAK, LDK Green Hills Academy “GHA”.

Mu bagabo, itsinda A rigizwe na New Star BBC (Burundi), UGB na APR BBC naho itsinda B rigizwe na REG BBC, Shoot 4 the Stars na Espoir BBC.

Mu bagore, itsinda A rigizwe na IPRC Huye BBC, PJB (RDC) na REG BBC naho itsinda B rigizwe na The Hoops BBC, Young Sisters BBC (Burundi) na Wonderful BBC (RDC).

Mu bakanyujijeho, itsinda A ririmo UGB na Techno BBC (Burundi) naho itsinda B rigizwe na Gorillas Stars BBC na Bakolo BBC (RDC).

Imikino iteganyijwe kuri uyu wa Gatatu taliki 26 Ukwakira 2022, mu cyiciro cy’amashuri, ikipe LDK irakina na IFAK (16h00) umukino ubere muri STECOL naho ikipe ya GHA ikine na CSA (18h00), umukino ubere muri Green Hills Academy.

Mu bagabo, imikino iteganyijwe, ikipe ya APR BBC irakina na UGB (18h00) naho ikipe ya Shoot 4 the Stars ikine na  Espoir BBC (20h00). Imikino yombi irabera muri  STECOL mu cyanya cyahariwe inganda i Masoro.

Imikino y’amajonjora  mu byiciro byose izakomeza  taliki 27 na 28 Ukwakira 2022 aho izabera muri STECOL na KEPLER (Kinyinya) hanyuma imikino ya nyuma ibe taliki 29 Ukwakira 2022 muri BK Arena.

Iri rushanwa “Legacy Tournament  2022” riri muri gahunda yo guteza imbere umukino wa Basketball hongerwa amarushanwa, gufasha abakinnyi gukomeza gukina bitegura umwaka w’imikino utaha wa 2022-2023, guha agaciro  no kuzirikana  abagize uruhare mu burezi no gutoza abakinnyi batandukanye cyane cyane abashinze iyi kipe ya UGB  kuva mu 1998 ari bo Shampiyona Aimable wari umuyobozi wa LDK akaba yaritabye Imana muri 2004 na Nizeyimana Jean De Dieu wari umwarimu akaba yaritabye Imana muri 2007.