Basketball : Ikipe y’u Rwanda yabuze itike y’igikombe cy’Isi

Taliki 06 na 07 Gicurasi 2023   mu Mujyi wa Eilat muri Israel habereye imikino yo gushaka itike y’igikombe cy’Isi mu mukino wa Basketball bakina ari batatu kuri batatu mu bagabo n’abagore “FIBA 3×3 World Cup Qualifier 2023”.

Iyi mikino yitabiriwe n’amakipe 6 mu bagabo n’abagore.

Mu bagabo  amakipe yari  mu matsinda abiri, itsinda A ryari rigizwe na Israel, Hungary na New Zealand naho itsinda  B rigizwe na Slovenia, China n’u Rwanda.

Ikipe y’ u Rwanda yari igizwe na  Turatsinze Olivier, Ngabonziza Patrick, Hagumintwari  Steven na Nshobozwabyosenumukiza Jean Jacques Wilson  ntabwo yabashije kwitwara neza kuko yatsinzwe na  Slovenia amanota 21 kuri 19 inatsindwa na China  amanota 19 kuri 17.

Iyi kipe y’u Rwanda yasoreje  ku mwanya wa 5,  umwanya wa mbere wegukanwe na Slovenia, ikurikirwa na Israel (2), Hungary (3) na China (4) naho New Zealand isoreza ku mwanya wa nyuma wa 6.

Ikipe y’u Rwanda iyi ni inshuro ya kabiri yari yitabiriye imikino yo gushaka itike y’igikombe cy’Isi kuko mu Kuboza 2022 yitabiriye imikino y’Afurika “FIBA 3×3 Africa Cup 2022” i Cairo mu Misiri yegukana umwanya wa 3  aho ikipe ya Madagascar yegukanye igikombe ikanabona itike y’igikombe cy’Isi.

Mu bagore amakipe 6 yitabiriye yari yashyizwe mu matsinda abiri, itsinda A ryari rigizwe na Czech Republic, Australia na Madagascar naho itsinda B rigizwe na Israel, Switzerland na Colombia.

Ikipe ya Australia yegukanye umwanya wa mbere, ikurikirwa na Czech Republic (2), Israel (3), Colombia (4), Switzerland (5) na Madagascar (6).

Nyuma y’iri rushanwa, amakipe 6  harimo 3 mu bagabo n’andi 3 mu bagore yabonye itike y’igikombe cy’Isi.

Aya ni  Slovenia, Israel na Hungary mu bagabo na Australia, Czech Republic na Israel mu bagore.

Imikino ya nyuma y’igikombe cy’Isi  “FIBA 3×3 World Cup 2023”  izabera i Vienna muri Austria kuva taliki 30 Gicurasi kugeza 04 Kamena 2023. Amakipe 20 muri buri cyiciro (Abagabo n’abagore)  azitabira akaba yaramaze gushyirwa mu matsinda.

Mu bagabo, itsinda A rigizwe na Serbia, France, Germany, Brazil na Madagascar. Itsinda B rigizwe na Slovenia, USA, Latvia, Austria na Australia. Itsinda C rigizwe na Israel, Lithuania, Belgium, Poland na Puerto Rico naho itsinda D rigizwe na Hungary, Netherlands, Mongolia, Switzerland na Japan.

Mu bagore, itsinda A rigizwe na France, Netherlands, Spain, Austria na Brazil. Itsinda B ririmo Australia, Germany, Japan, Poland na Egypt. Itsinda C rigizwe na Czech Republic, USA, Canada, Mongolia na Hungary naho itsinda D rigizwe na Israel, Lithuania, China, Romania na Italy.