Basketball:  Ikipe y’u Rwanda U-18  yatangiye kwitegura imikino y’Afurika izabera muri Madagascar

Kuva taliki 04 kugeza 15 Kanama 2022 mu mujyi wa  Antananarivo muri Madagascar hazabera imikino  y’Afurika  mu mukino wa Basketball mu batarengeje imyaka 18 mu bahungu “FIBA U-18 African Championship 2022”.

Iri rushanwa rizitabirwa n’amakipe 10 arimo ikipe y’u Rwanda, Madagascar, Algeria, Angola, Benin, Misiri, Guinea, Mali, Senegal na Tanzania. Iyi ni inshuro ya kabiri Madagascar igiye kwakira iyi mikino y’Afurika nyuma yo kuyakira bwa mbere muri 2014.

Nk’uko tubikesha ishyirahamwe ry’umukino wa Basketball mu Rwanda “FERWABA”, ikipe y’u Rwanda yatangiye umwiherero yitegura iri rushanwa aho  abakinnyi 20 ari bo bahamagawe.

Urutonde rw’abakinnyi 20 batangiye imyitozo

Aba bakinnyi ni Bahizi Meddy, Hirwa Yvan, Kwizera Hubert Sage, Tuyizere David, Nkurunziza Hirwa Boris, Ndatimana Herve, Cyiza Nshuti Chandelier Twizeyimana, Kayinamura Emmanuel, Nubaha Ghislain, Mugalu Mike, Ishimwe Arsene, Izere Rutsindura Brilliant Brave, Karenzi Brian, Rutikanga Sano Dick, Kabera Prince, Rugamba Nzungize Just, Patrick Junior, Rusizana Allan, Ndaruhutse Pacifique na Ruhamyandekwe Cio.

Iyi mikino y’Afurika igiye kuba ku nshuro ya 21, amakipe abiri azitwara neza azabona itike yo kuzaserukira Afurika mu mikino y’igikombe cy’Isi mu batarengeje imyaka 19  “FIBA U-19 Basketball World Cup 2023” izabera muri  Hungary.

Ikipe y’u Rwanda U-18 yabonye itike yo kwitabira iyi mikino y’Afurika nyuma yo kwitwara neza aho yegukanye igikombe cy’Akarere ka 5, imikino  yabereye i Kampala muri Uganda kuva taliki 12-18 Kamena 2022.

Basketball: Ikipe y’u  Rwanda na Uganda zegukanye igikombe cy’Akarere ka 5

Iyi kipe y’u Rwanda ni inshuro ya 5 igiye kwitabira imikino y’Afurika . Inshuro 4 ziheruka ni  2010, 2012, 2016 na 2018. Muri 2010 na 2016, iri rushanwa ryabereye mu Rwanda. Ikipe y’u Rwanda yitwaye neza muri  2016 ubwo yasorezaga ku mwanya wa 5 naho ubwo iheruka muri iyi mikino muri 2018 yasoreje ku mwanya wa 6.

Kugeza ubu, ikipe y’u Rwanda  ntirabasha kubona itike y’imikino y’igikombe cy’Isi   “FIBA U-19 Basketball World Cup”. Ku rutonde, ikipe y’u Rwanda U-18 iri ku mwanya wa 51 ku Isi na 09 muri Afurika.