Basketball: Ikipe ya Patriots BBC na   REG BBC  zimaze gutsinda umukino umwe  muri  Playoffs 2022

Taliki 10-09-2022

APR BBC 65-58 REG BBC

REG BBC 79-70 Patriots BBC

Taliki 11-09-2022

REG BBC-APR BBC (BK Arena-18h00)

Patriots BBC-REG BBC (BK Arena-20h00)

Ikipe ya REG BBC  ifite igikombe giheruka  cya shampiyona  ya Basketball mu Rwanda  ndetse na Patriots BBC  zombi ubu zimaze gutsinda umukino umwe  muri “Playoffs 2022”.

Taliki 07 Nzeri 2022 ni bwo hatangiye imikino ya nyuma ya “Playoffs 2022” aho  mu bagabo  ikipe ya Patriots BBC yitwaye neza igatsinda REG BBC amanota 75 kuri 70.

Kuri uyu wa Gatandatu taliki 10 Nzeri 2022 habaye umukino wa nyuma wa kabiri aho ikipe ya REG BBC yitwaye neza itsinda Patriots BBC amanota 79 kuri 70 nyuma yo kwitabaza iminota y’inyongera kuko imikino yagenwe yarangiye amakipe anganya amanota 65 kuri 65.

Ikipe ya Patriots BBC yatangiye neza itsinda agace ka mbere n’aka abiri amanota 25 kuri 18 na 18 kuri 17. Ikipe ya REG BBC nayo yatsinze uduce tubiri twa nyuma ku manota 18 kuri 12 na 12 ku 10 birangira amakipe anganyijwe amanota 65 kuri 65. Mu minota 5 y’inyongera, REG BBC yakoze amanota 14 kuri 5 ya Patriots BBC ari byo byatumye ikipe ya REG BBC yegukana intsinzi ku manota 79 kuri 70.

Muri iki cyiciro cy’abagabo hakinwe umukino wo guhatanira umwanya wa 3 aho ikipe ya APR BBC yatsinze Tigers BBC amanota 95 kuri 42.

Mu bagore naho ubu buri kipe  hagati ya REG BBC na APR BBC  zimaze gutsinda umukino umwe.

Mu mukino wa nyuma wa kabiri wabaye  kuri uyu wa Gatandatu taliki 10 Nzeri 2022, ikipe ya APR BBC yatsinze REG BBC amanota 65 kuri 58. Umukino wa mbere taliki 07 Nzeri 2022, ikipe ya REG BBC yari yatsinze APR BBC amanota 60 kuri 57.

Muri iki cyiciro kandi habaye umukino wo guhatanira umwanya wa gatatu aho ikipe ya IPRC Huye BBC yawegukanye itsinze The Hoops amanota 58 kuri 35.

Imikino ya  nyuma ya “Playoffs 2022” irakomeza

Kuri iki Cyumweru taliki11 Nzeri 2022, imikino ya nyuma ya “Playoffs 2022” irakomeza  hakinwa umukino wa 3. Mu bagore ikipe ya REG BBC irakina na APR (18h00).

Mu bagabo, ikipe ya Patriots BBC irakina na REG BBC (20h00). Iyi mikino yombi ikaba ibera muri BK Arena.

Abakunzi b’umukino wa Basketball bifuza kureba iyi mikino  bagura itike bakoreshe uburyo bw’ikoranabuhanga  banyuze kuri uru rubuga “http://ticqet.rw”