BAL 2023: Ikipe ya REG BBC yabonye itike yo gukomeza mu cyiciro cya nyuma
-
- Werurwe 16, 2023
- Hashize imyaka 4
US Monastir 85-75 Kwara Falcons
REG BBC 69-55 AS Douanes
Talki 17-03-2023
ABC Fighters-US Monastir (Dakar Arena-1800)
AS Douanes-Stade Malien (Dakar Arena-21h30)
Ikipe ya REG BBC nyuma yo gutsinda umukino wa gatatu yahise ibona itike y’icyiciro cya nyuma ya BAL 2023.
Ku wa Gatatu taliki 15 Werurwe 2023 ni bwo hakinwe imikino y’umunsi wa 4 aho ikipe ya REG BBC ihagarariye u Rwanda yitwaye neza igatsinda AS Douanes yo muri Senegal amanota 69 kuri 55.
Muri uyu mukino, REG BBC yatsinze uduce dutatu tubanza, 25 kuri 12, 17 kuri 12 na 15 kuri 12. Agace ka nyuma ka 4, AS Douanes yagatsinze ku manota 19 kuri 12 birangira REG BBC yegukanye intsinzi ku kinyuranyo cy’amanota 14 (69-55).
Umukinnyi wa REG BBC, Nshobozwabyosenumukiza Jean Jacques Wilson ni we witwaye neza muri uyu mukino aho yatsinze amanota 14, atanga imipira 4 yavuyemo amanota ndetse anagarura imipira 9 itarageze mu nkangara “Rebounds”.
Ikipe ya REG BBC nyuma yo gutsinda uyu mukino wa gatatu yahise ibona itike y’imikino y’icyiciro cya nyuma “BAL Playoffs & Finals” izabera i Kigali taliki 21 kugeza 27 Gicurasi 2023.
Gusa iyi kipe isigaje imikino ibiri aho taliki 18 Werurwe 2023 izakina na Stade Malien yo muri Mali naho taliki 20 Werurwe 2023 ikine usoza na US Monastir yo muri Tunisia. Nyuma y’iyi mikino ni bwo hazamenyekana umwanya ikipe ya REG BBC isorejeho.
US Monastir yatsinze umukino wa kabiri
Ikipe ya US Monastir yo muri Tunisia ifite igikombe giheruka yitwaye neza itsinda Kwara Falcons yo muri Nigeria amanota 85 kuri 75. Iyi kipe ya US Monastir akaba ari umukino wa kabiri itsinze kuko umukino wa mbere yari yitwaye neza itsinda Stade Malien yo muri Mali amanota 78 kuri 68.
Nyuma y’imikino y’umunsi wa 4, ikipe ya REG BBC ni yo ikomeje kuyobora urutonde by’agateganyo.
Gahunda y’imikino y’umunsi wa 5
Imikino y’umunsi wa 5 izaba ku wa Gatanu taliki 17 Werurwe 2023 aho ikipe ya ABC Fighters yo muri Cote d’Ivoire izakina na US Monastir naho ikipe ya AS Douanes ikine na Stade Malien. Iyi mikino ikaba irimo kubera muri Dakar Arena.
-
- Werurwe 16, 2023
- Hashize imyaka 4
