Abasirikare b’u Rwanda muri Sudani y’Epfo bambitswe imidali y’ishimwe

Abasirikare b’u Rwanda  muri Sudani y’Epfo bambitswe imidali y’ishimwe

Ingabo z’u Rwanda zibarizwa mu mutwe wa Rwanbatt-1, ziri mu Butumwa bw’Umuryango w’Abibumbye (Loni) bwo kubungabunga amahoro muri Sudani y’Epfo [UNMISS] zambitswe imidali y’ishimwe kubera umuhate wabo mu kubungabunga umutekano w’abasivili no kubahiriza inshingano zabo.

Uyu muhango wabereye ku Cyicaro cya UNMISS cya Tomping, giherereye mu Mujyi wa Juba, kuri uyu wa Kabiri, tariki ya 3 Werurwe 2026.

Umugaba Mukuru Wungirije w’Ingabo ziri muri UNMISS, Maj Gen Robert Yaw Affram, wayoboye uyu muhango yagaragaje ko uwo mudali ari ikimenyetso gikomeye cy’ubwitange n’umurava mu kazi.

Yagize ati: “Umudali wa Loni mwahawe uyu munsi ni ikimenyetso cy’ubunyamwuga, imyitwarire myiza, kwitanga no gukomera ku nshingano zo kubungabunga amahoro. Ugaragaza iminsi myinshi y’akazi mu bihe bikomeye, amajoro yo kurara ku burinzi no mu bikorwa bitandukanye, ndetse n’ubutwari bwo gukomera ku nshingano mu bihe bitoroshye. Ni umudali ukorerwa, ntutangwa gutyo gusa.”

Maj Gen Affram yanashimiye Guverinoma y’u Rwanda n’Ingabo z’u Rwanda (RDF) ku bwo gukomeza kohereza ingabo zifite imyitwarire myiza, ubushobozi n’ubunyamwuga mu butumwa bwa UNMISS.

Umuyobozi wa Rwanbatt-1, Lt Col Paul Ndushabandi, yashimye abasirikare bagize uwo mutwe ku bw’umuhate, kwihangana n’ubutwari no kwitanga bagaragaje mu gihe cy’amezi icumi bamaze mu butumwa.

Ati: “Ndashishikariza Rwanbatt-1 gukomeza uyu muhate mu gihe gisigaye cy’ubutumwa. Uyu muhango wo kwambara imidali ni indi ntambwe ikomeye mu murimo wacu w’icyubahiro wo kurengera ikiremwamuntu”

Uyu muhango, waranzwe n’imyiyereko ya gisirikare, hamwe n’imbyino zigaragaza umuco nyarwanda, byakozwe na Rwanbatt-1 mu kwizihiza uyu munsi mukuru.

Ingabo z’u Rwanda zikomeje kuba intangarugero mu ruhando mpuzamahanga
Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27