Perezida Museveni yabwiye Kagame ko gutorwa kwe bishimangira icyizere Abanyarwanda bamufitiye

Perezida Museveni yabwiye Kagame ko gutorwa kwe bishimangira icyizere Abanyarwanda bamufitiye

Perezida wa Uganda, Yoweri Kaguta Museveni, yashimiye Perezida wa Repubulika y’u Rwanda, Paul Kagame uherutse gutorera kongera kuyobora u Rwanda, ashimangira ko itorwa rye, rigaragaza icyizere gikomeye afitiwe n’Abanyarwanda.

Perezida Museveni kandi yanashimiye n’Umuryango FPR- Inkotanyi, Perezida Kagame abereye Chairman, ku ntsinzi babonye yo gukomeza kuyobora u Rwanda mu myaka itanu iri imbere.

Ni amatora y’Umukuru w’Igihugu n’ay’Abadepite yabaye tariki ya 14 kugeza tariki ya 16 Nyakanga 2024

Mu by’ibanze byavuye mu matora ya Perezida wa Repubulika n’ay’Abadepite, Komisiyo y’Igihugu y’Amatora, NEC, yagaragaje ko Paul Kagame yagize amajwi 99,15%, arusha abo bari bahatanye barimo Dr Frank Habineza wagize 0,53% mu gihe Mpayimana Philippe yagize 0,32%.

Nyuma yo gutsinda amatora, Abakuru b’Ibihugu bitandukanye bashimiye Perezida Paul Kagame wongeye gutorerwa kuyobora u Rwanda muri manda ya kane.

Perezida Museveni abinyujije ku rukuta rwe rwa X, yagize ati: “Kongera gutorwa kwawe ni gihamya ku cyizere abaturage b’u Rwanda bafitiye imiyoborere yawe.’’

Perezida Museveni yijeje Paul Kagame ko Uganda n’u Rwanda bizakomeza gukorana mu nyungu z’abaturage b’ibihugu byombi.

Yakomeje ati: “Uganda ifata u Rwanda nk’umufatanyabikorwa w’imena mu cyerekezo gihuriweho kigana ku kwimakaza amahoro n’iterambere. Tuzakomeza gukorana mu bifitiye inyungu ibihugu byacu n’Umuryango w’Afurika y’Iburasirazuba.”

Umubano w’u Rwanda na Uganda umaze igihe wongeye kuzahuka nyuma y’igihe wari umaze urimo agatotsi ku mpande zombi.

Mu bamushimiye bo mu Karere k’Afurika y’Iburasirazuba barimo Perezida wa Tanzania, Samia Suluhu Hassan na William Ruto wa Kenya.

Museveni yashimiye mugenzi we w’u Rwanda, Paul Kagame mu gihe Kuri uyu wa 18 Nyakanga 2024 ari bwo Komisiyo y’Igihugu y’Amatora NEC, itangaza by’agateganyo ibyavuye mu matora ya Perezida wa Repubulika n’ay’Abadepite, ikazatangaza bitarenze ku wa 27 Nyakanga 2024 amajwi ya burundu.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27