Perezida Kagame yageze i Conakry yakirwa na Perezida Doumbouya 

Perezida Kagame yageze i Conakry yakirwa na Perezida  Doumbouya 

Perezida wa Repubulika y’u Rwanda Paul Kagame, yageze i Conakry muri Guinea, aho yatangiye uruzinduko rw’akazi rugamije kurushaho gutsura umubano w’ibihugu byombi. 

Perezida Kagame wari ukubutse muri Senegal, yakiriwe na Perezida wa Repubulika ya Guinea Mamadi Doumbouya ku Kibuga cy’Indege Mpuzamahanga cyitiriwe Ahmed Sékou Touré.

Abakuru b’Ibihugu byombi bagiranye ibiganiro byabereye mu muhezo, bikaba byibanze ku kurushaho kunoza ubutwererane bukomeje gutanga umusaruro mu nzego zinyuranye zirimo ikoranabuhanga, ubucuruzi n’ishoramari. 

Ibiro by’Umukuru w’Igihugu wa Guinea byasabye abayobozi batandukanye kugira uruhare mu kwakira no guha ikaze Perezida Kagame mu cyubahiro kimukwiriye.

Urwo ruzinduko rwa Perezida Kagame muri Guinea rubaye nyuma y’amezi make Perezida Mamadi Doumbouya na we agiriye uruzinduko i Kigali nk’ikimenyetso cy’ubushuti bukomeje kwaguka hagati y’ibihugu byombi mu nzego zitandukanye.

Uruzinduko Mamadi Doumbouya aheruka kugirira mu Rwanda rwabaye muri Mutarama uyu mwaka, aho yasize afunguye Ambasade y’Igihugu cye i Kigali, akanakurikirana isinywa ry’amasezerano yagamije kurushaho kwimakaza ubutwererane mu bya dipolomasi.

Mu nzego ibihugu byombi bikomeje kwaguramo ubufatanye harimo urwo gusangira ubunararibonye mu guteza imbere ubucukuzi bw’amabuye y’agaciro, ubutwererane mu rwego rw’ubukungu ndetse no mu birebana n’umutekano.

Na none kandi mu mezi umunani yabanjirije urwo ruzinduko, Perezida na we yasuye Mamadi Doumbouya ari na rwo ruzindukpo rwa mbere Perezida Kagame yari agiriye muri icyo gihugu nyuma ya kudeta yabaye muri Nzeri 2021.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. RSSB Tigers yatangiye nabi imikino mpuzamigabane ya FIBA 22 Nzeri 2026 Saa 12:59
  2. Umuramyi Eric Reagan Ngabo mu bahatanira igihembo muri America Gospel Talent 22 Nzeri 2026 Saa 12:51
  3. U Buyapani: Inkubi y’umuyaga yahitanye abantu bane, ica insinga z’amashanyarazi 22 Nzeri 2026 Saa 12:38
  4. Ibyo wamenya kuri FIBA Intercontinental Cup, RSSB Tigers yitabiriye  22 Nzeri 2026 Saa 10:47
  5. Nyagatare: Imvura idasanzwe yasenye inzu 30 n’icyumba cy’ishuri  22 Nzeri 2026 Saa 10:27