Cricket: Nigeria yegukanye igikombe itsinze ikipe y’u Rwanda

Umwanya wa gatatu

Cameroun 84-85 Sierra Leone

Umukino wa nyuma

Nigeria 99-90 Rwanda

Ikipe y’igihugu ya Nigeria ni yo yegukanye igikombe cy’irushanwa mpuzamahanga mu mukino wa Cricket mu cyiciro cy’abagore “NCF Women’s T20 International Cricket Tournament 2023”.

Iri rushanwa ritegurwa n’ishyirahamwe ry’umukino wa Cricket muri Nigeria “NCF” ryari ryitabiriwe n’amakipe 5 ari yo u Rwanda, Cameroun, Sierra Leone, Ghana na Nigeria. Irushanwa ryatangiye taliki 27 Werurwe 2023 aho amakipe yakinnye hagati yayo hanyuma ikipe ya mbere n’iya kabiri zihatanira igikombe naho ikipe ya 3 n’iya 4 zihatanira umwanya wa 3.

Nyuma y’imikino y’amajonjora yabaye taliki 01 Mata 2023, ikipe y’ u Rwanda yari ifite igikombe giheruka muri 2022 ni yo yasoje iyoboye n’amanota 8 naho Nigeria iba iya kabiri n’amanota 6.

Ikipe ya Sierra Leone yasoreje ku mwanya wa 3 n’amanota 4 naho Cameroun iba iya 4 n’amanota 2.

Ku munsi wa nyuma w’iri rushanwa, taliki 02 Mata 2023, ikipe ya Sierra Leone yakinnye na Cameroun mu guhatanira umwanya wa 3. Ikipe ya Sierra Leone yitwaye neza itsinda Cameroun yegukana umwanya wa 3.

Ku mukino wa nyuma, ikipe ya Nigeria yitwaye neza itsinda u Rwanda ku kinyuranyo cy’amanota 9.

Muri uyu mukino, ikipe ya Nigeria ni yo yatangiye ikubita agapira ishaka amanota “Batting” maze mu dupira 120 (20 Overs) ikora amanota 99 aho abakinnyi 4 ari bo basohowe mu kibuga (4 Wickets).

Mu gice cya kabiri, ikipe y’u Rwanda yasabwaga amanota 100 yatangiye  gukubita agapira ishaka amanota “Batting”  maze mu dupira 120 (20 Overs) ikora amanota 90 mu gihe abakinnyi 9 ari bo basohowe mu kibuga (9 Wickets).

Ikipe ya Nigeria yahise yegukana intsinzi ku kinyuranyo  cy’amanota 9. Iyi kipe ya Nigeria ikaba yari yatsinzwe n’u Rwanda mu mukino w’amajonjora ku kinyuranyo cy’amanota 39.

Nyuma yo gutsinda uyu mukino, ikipe ya Nigeria ni yo yegukanye igikombe cyari cyegukanwe n’u Rwanda umwaka ushize wa 2022.