Cricket : Ikipe y’u Rwanda ifite amahirwe yo kwisubiza igikombe

Cameroun 81-82 Sierra Leone

Rwanda 100-61 Nigeria

Taliki 02-04-2023

Umwanya wa gatatu

Cameroun-Sierra Leone (10h30)

Umukino wa nyuma

Rwanda-Nigeria (14h50)

Ikipe y’u Rwanda nyuma yo gutsinda imikino yose y’amajonjora  ifite amahirwe yo kwisubiza igikombe cy’irushanwa mpuzamahanga mu mukino wa Cricket mu cyiciro cy’abagore “NCF Women’s T20 International Cricket Tournament 2023” ririmo kubera i Lagos muri Nigeria guhera taliki 27 Werurwe 2023.

Ku wa Gatandatu taliki 01 Mata 2023 ni bwo habaye imikino y’umunsi wa 5 ari yo isoza imikino y’amajonjora.

Mu mikino yabaye, ikipe y’u Rwanda yatsinze Nigeria ku kinyuranyo cy’amanota 39.

Muri uyu mukino, ikipe y’u Rwanda ni yo yatangiye ikubita agapira ishaka amanota “Batting” aho mu dupira 120 (20 Overs) yakoze amanota 100 mu gihe abakinnyi 7 ari bo basohowe mu kibuga (7 Wickets).

Ikipe ya Nigeria yasabwaga amanota 101, mu gice cya kabiri yatangiye gukubita agapira ishaka amanota “Batting”, ubwo hari  hamaze gukinwa udupira 100 (16.4 Overs), abakinnyi 10 ba Nigeria basohowe mu kibuga (10 Wickets)  aho bari bamaze gukora amanota 61.

Umukinnyi  w’u Rwanda, Margueritte Vumiliya ni we witwaye neza muri uyu mukino aho yasohoye mu kibuga abakinnyi 3 ba Nigeria.

Mu wundi mukino wabaye, ikipe ya  ya Sierra Leone yitwaye neza itsinda Cameroun.

Nyuma y’iyi mikino y’umunsi wa 5, ikipe y’u Rwanda yasoje  iyoboye urutonde n’amanota 8, ku mwanya wa hari  Nigeria n’amanota 6, ku mwanya wa 3 hari Sierra Leone n’amanota 4,  Cameroun iri ku mwanya wa 4 n’amanota 2 naho  Ghana iri ku mwanya wa nyuma wa 5 aho nta nota na rimwe ifite.

Irushanwa rirasozwa  hakinwa imikino ya nyuma

Kuri iki Cyumweru taliki 02 Mata 2023 ni bwo irushanwa “NCF Women’s T20 International Cricket Tournament 2023” risozwa hakinwa imikino ya nyuma.

Imikino iteganyijwe, ikipe ya Sierra Leone irakina na Cameroun mu guhatanira umwanya wa 3. Umukino uteganyijwe saa tatu n’igice (9h30) i Lagos akaba ari saa yine n’igice (10h30) i Kigali.

Umukino wa nyuma urahuza ikipe y’u Rwanda na Nigeria guhera  saa saba n’iminota 50 (13h50) i Lagos akaba ari  saa munani n’iminota 50 (14h50) i Kigali.

Ikipe y’u Rwanda ifite amahirwe yo kwisubiza iki gikombe dore ko ari yo yacyegukanye ubwo  iri rushanwa ryakinwaga ku nshuro ya mbere umwaka ushize wa 2022 na bwo  itsinze Nigeria ku mukino wa nyuma.