Amagare: Niyonkuru Samuel yegukanye “Kivu Belt Race 2023”

Abagabo (106, 5 km)

1. Niyonkuru Samuel 02h40’45”

2. Muhoza Eric 02h40’45”

3. Tuyizere Etienne 02h42’12”

Abagore (63, 9 km)

1. Nirere Xaverine 01h54’51”

2. Mukashema Josiane 01h57’05”

3. Mwamikazi Djazilla 01h57’06”

Ingimbi (63, 9 km)

1. Nshutiraguma Kevin 01h47’42”

2. Nshimiyimana Phocas 01h47’42”

3. Shyaka Janvier 01h47’42”

Abangavu (63, 9 km)

1. Byukusenge Mariatha 01h59’12”

2. Uwera Aline 01h59’45”

3. Iragena Charlotte 01h59’51”

Taliki 26 Werurwe 2023 mu Karere ka Rubavu habereye isiganwa “Kivu Belt Race 2023” ryateguwe n’ishyirahamwe ry’umukino w’amagare mu Rwanda “FERWACY”  ku bufatanye n’Akarere ka Rubavu.

Iri siganwa ryitabiriwe n’abakinnyi mu byiciro bitandukanye, abakuru n’abato mu bakobwa n’abahungu.

Mu cyiciro cy’abagabo “Men Elite & U-23”, Niyonkuru Samuel ukinira ikipe ya INOVOTEC ni we wegukanye iri siganwa aho mu ntera ya kilometero 106,5 yakoresheje amasaha 2, iminota 40 n’amasegonda 45 akaba yaragereye ku murongo rimwe na Muhoza Eric ukinira ikipe ya Bike Aid. Ku mwanya wa 3 haje  Tuyizere Etienne ukinira Benediction Club wakoresheje  amasaha 02 iminota 42 n’amasegonda 12.

Muri iki cyiciro  hari hiyandikishije abakinnyi 50 ariko 44 ni bo batangiye isiganwa hasoza 15 naho 6 ntibakinnye.

Mu bagore “Women Elite”, Nirere Xaverine ni we wegukanye umwanya wa mbere aho muri kilometero 63, 9 yakoresheje isaha 1, iminota 54 n’amasegonda 51. Yakurikiwe ku mwanya wa kabiri na Mukashema Josiane (01h57’05”) naho ku mwanya wa 3 haza Mwamikazi Djazilla (01h57’06”).

Muri iki cyiciro hari hiyandikishije abakinnyi 11 ariko 10 ni bo batangiye isiganwa hasoza 6.

Mu cyiciro cy’ingimbi “Men Juniors”, Nshutiraguma Kevin ukinira Cine Elmay yegukanye umwanya wa mbere  aho muri kilometero 63,9 yakoresheje isaha 1, iminota 47 n’amasegonda 42 akaba yarakoresheje ibihe bimwe na Nshimiyimana Phocas (Nyabihu CT) na Shyaka Janvier.

Muri iki cyiciro hari hiyandikishije abakinnyi 33 gusa 30 ni bo batangiye isiganwa hasoza 22.

Mu bangavu “Women Juniors”,  Byukusenge Mariatha yegukanye umwanya wa mbere  aho yakoresheje isaha  1, iminota 59 n’amasegonda 12 yakurikiwe na  Uwera Aline (01h59’45”) na Iragena Charlotte (01h59’51”) bose bakaba bakinira ikipe ya Bugesera WCT.

Habaye kandi  isiganwa ry’abakiri bato bari munsi y’imyaka 16 mu bahungu n’abakobwa aho basiganwe kilometero 42,6.

Mu bahungu Byusa Pacific (Les Amis Sportifs) yegukanye umwanya wa mbere akoresheje iminota 39 n’amasegonda 15 akurikirwa na Niyotwizera Lambert (Cine Elmay CC) wakoresheje iminota 39 n’amasegonda 38 naho ku mwanya wa 3 haza Gisubizo Issa (Les Amis Sportifs) wakoresheje iminota 41 n’amasegonda 53.

Mu bakobwa, Niyokwizerwa Clementine ni we wabaye uwa mbere akoresheje iminota 40 n’amasegonda 19, yakurikiwe na Ishimwe Françoise (53’20”) naho ku mwanya wa gatatu haza Muramutsa Deborah (55’57”). Aba bose bakinira ikipe ya Bugesera CT.

Irushanwa rizakurikiraho ni iryo Kwibuka “Race to Remember 2023” rizaba muri Mata 2023.