BAL 2023: Amakipe 4 azakina imikino ya nyuma yamenyekanye
-
- Werurwe 22, 2023
- Hashize imyaka 4
Stade Malien 90-71 ABC Fighters
US Monastir 60-76 AS Douanes
Nyuma y’imikino y’umunsi wa nyuma, ikipe ya Stade Malien, AS Douanes, REG BBC na ABC Fighters yabonye itike yo kuzakina imikino ya nyuma ya BAL 2023 izabera i Kigali muri Gicurasi 2023.
Kuva taliki 11 kugeza 21 Werurwe 2023 i Dakar muri Senegal habereye imikino y’amajonjora yo mu itsinda A “Sahara Conference” mu mikino y’Afurika “Basketball Africa League (BAL 2023)”. Iri tsinda rikaba ryari rigizwe na ABC Fighters (Côte d’Ivoire), AS Douanes (Senegal), Kwara Falcons (Nigeria), REG BBC (Rwanda), Stade Malien (Mali) na US Monastir (Tunisia).
Aya makipe yakinnye hagati yayo aho taliki 21 Werurwe 2023 hakinwe imikino isoza. Ikipe ya Stade Malien yo muri Mali yatsinze ABC Fighters yo muri Cote d’Ivoire amanota 90 kuri 71.
Undi mukino, ikipe ya AS Douanes yo muri Senegal yari iri iwayo yatsinze US Monastir yo muri Tunizia ifite igikombe giheruka amanota 76 kuri 60.
Iyi mikino y’umunsi wa nyuma yagiye kuba hataramenyekana imyanya amakipe asorezeho uretse Kwara Falcons. Ikipe ya ABC Fighters ni yo yari iyoboye urutonde ikurikiwe na US Monastir, REG BBC iri ku mwanya wa 3, AS Douanes yari iri ku mwanya wa 4, Stade Malien iri ku mwanya wa 5 naho Kwara Falcons iri ku mwanya wa nyuma wa 6.
Nyuma y’iyi mikino, ikipe ya Stade Malien ni yo yasoje iyoboye urutonde ikurikiwe na AS Douanes, REG BBC ku mwanya wa 3, ABC Fighters ku mwanya wa 4, ku mwanya wa 5 hasoreje US Monastir naho ikipe ya Kwara Falcons isoreza ku mwanya wa nyuma wa 6. Aya makipe 5 akaba yose yaratsinze imikino 3 atsindwa 2.
Amakipe 4 ya mbere, Stade Malien, AS Douanes, REG BBC na ABC Fighters ni yo yabonye itike yo gukomeza mu cyiciro cy’imikino ya nyuma “BAL Playoffs & Finals” izabera i Kigali taliki 21 kugeza 27 Gicurasi 2023.
Ikipe ya US Monastir yabaye iya kabiri ubwo BAL yakinwaga ku nshuro ya mbere muri 2021 ikegukana igikombe giheruka cya BAL 2022 nta bwo yashoboye kubona itike yo kuzakina iyi mikino ya nyuma.
Andi makipe 4 azakomeza mu cyiciro cya nyuma azamenyekana nyuma y’imikino y’amajonjora yo mu itsinda B “Nile Conference” izabera i Cairo mu Misiri kuva taliki 26 Mata kugeza 06 Gicurasi 2023. Amakipe 6 azahatanira imyanya 4 ni Al Ahly (Egypt), Cape Town Tigers (South Africa), City Oilers (Uganda), CFV Beira (Mozambique), Petro de Luanda (Angola) na SLAC (Guinea).
-
- Werurwe 22, 2023
- Hashize imyaka 4
