EAPCCO Games 2023: Polisi y’u Rwanda yatangiye yitwara neza

Kuri uyu wa Kabiri  taliki 21 Werurwe 2023 ni bwo mu Rwanda   hatangiye imikino ihuza ibihugu bigize umuryango w’abayobozi ba Polisi zo mu bihugu byo mu Karere k’Afurika y’Iburasirazuba “EAPCCO Games 2023” .

Iyi mikino yabimburiwe n’ibirori byo kwiyereka  aho abakinnyi basaga 1000  baturutse mu bihugu 8 ari byo  u Rwanda,  u Burundi, Uganda, Tanzania, Kenya, Sudani, Sudani y’Epfo na Ethiopia bakoze akarasisi, ibirori byabereye kuri  Kigali Pele Stadium i Nyamirambo.

Umuyobozi Mukuru wa Polisi y’u Rwanda “IGP”, DCG Namuhoranye Felix  yashimiye ibihugu byohereje abakinnyi kwitabira iyi mikino.

Yakomeje avuga ko umuryango wa EAPCCO wagize uruhare runini mu kubaka umutekano binyuze mu bikorwa by’ubufatanye hagati y’ibihugu byose 14 bigize uyu muryango.

DCG Namuhoranye Felix yagarutse ku kamaro k’ iyi mikino  aho yavuze ko kuyitegura ari ugushimangira ubufatanye binyuze muri siporo kuko ituma bose bahurira hamwe bagasabana, bakagira ibyo  biga ndetse bakongera imbaraga mu bikorwa kugira ngo  bagere kuri wa mutekano uhamye wifuzwa.

Umuyobozi wa Polisi Mpuzamahanga mu Karere “INTERPOL Regional Bureau”, Gideon Kimilu  yashimangiye ko intego nyamukuru y’iyi mikino atari  uguhatanira ibikombe ahubwo ko   ari uburyo bwo gukomeza ubufatanye bwa Polisi mu kurwanya no gukumira ibyaha byambukiranya imipaka.

Minisitiri w’Umutekano, Gasana Alfred yibukije abitabiriye ibirori byo gufungura iyi mikino “EAPCCO Games 2023” ko nta terambere ryabaho igihe umutekano udahari.  Ati “Kurwanya ibyaha byambukiranya imipaka ndetse n’umutekano muke ni  zimwe mu nkingi ziganisha ku itembere, ni ngombwa rero  ko habaho ubufatanye hagati y’inzego zishinzwe umutekano”.

Minisitiri Gasana yashimiye abagize uruhare mu itegurwa ry’iyi mikino.

Polisi y’u Rwanda yatangiye itsinda

Nyuma y’ibirori byo gufungura “EAPCCO Games 2023” habaye imikino ibiri aho mu mupira w’amaguru ikipe ya Polisi y’u Rwanda yatsinze Polisi y’u Burundi ibitego 3-1. Ibitego bya Polisi y’u Rwanda byatsinzwe na Hakizimana Muhadjiri, Mugisha Didier na Kayitaba Bosco naho igitego cya Polisi y’u Burundi gitsindwa na Hakizimana Tity.

Uyu mukino wabereye kuri Kigali Pele Stadium i Nyamirambo.

Muri Volleyball, ikipe ya Polisi y’u Rwanda yitwaye neza itsinda Polisi y’u Burundi amaseti 3-0 (25-18, 25-20 na 25-22). Uyu mukino wabereye muri BK Arena.

Gahunda y’imikino y’umunsi wa kabiri

Kuri uyu wa Gatatu taliki 22 Werurwe 2023, “EAPCCO Games 2023”  irakomeza ahateganyijwe imikino ngororamubiri “Athletics” kuri Sitade ya Bugesera, imikino y’iteramakofe “Boxing” muri Hilltop Hotel. Muri Netball, ikipe ya Uganda irakina na Tanzania kuri Club Rafiki (10h00) naho muri Volleyball, ikipe ya Kenya ikine n’u Burundi  muri BK Arena (18h00).