BAL 2023: REG BBC yasoje imikino y’amajonjora itsindwa na US Monastir
-
- Werurwe 21, 2023
- Hashize imyaka 4
Kwara Falcons 76-79 ABC Fighters
REG BBC 79-84 US Monastir
Taliki 21-03-2023
Stade Malien-ABC Fighters(18h00)
US Monastir-AS Douanes (21h30)
Ikipe ya REG BBC ihagarariye u Rwanda mu mikino ya BAL 2023 nta bwo yasoje neza imikino y’amajonjora nyuma yo gutsindwa imikino ibiri isoza.
Kuva taliki 11 Werurwe 2023 i Dakar muri Senegal harimo kubera imikino y’amajonjora yo mu itsinda A “Sahara Conference” mu mikino y’Afurika “Basketball Africa League (BAL 2023)”. Iri tsinda rikaba rigizwe na ABC Fighters (Côte d’Ivoire), AS Douanes (Senegal), Kwara Falcons (Nigeria), REG BBC (Rwanda), Stade Malien (Mali) na US Monastir (Tunisia).
Ikipe ya REG BBC yatangiye neza irushanwa itsinda imikino itatu yikurikiranya neza inabona itike yo kuzakina imikino ya nyuma izabera mu Rwanda taliki 21 kugeza 27 Gicurasi 2023. Iyi kipe yatsinze Kwara Falcons yo muri Nigeria amanota 64 kuri 48, itsinda ABC Fighters yo muri Cote d’Ivoire amanota 80 kuri 73 inatsinda AS Douanes yo muri Senegal amanota 69 kuri 55.
Nyuma yo kwitwara neza muri iyi mikino itatu ibanza, ikipe ya REG BBC nta bwo yitwaye neza mu mikino ibiri ya nyuma kuko yatsinzwe na Stade Malien yo muri Mali amanota 84 kuri 64, umukino wabaye taliki 18 Werurwe 2023. Umukino usoza wabaye kuri uyu wa Mbere taliki 20 Werurwe 2023, ikipe ya REG BBC yatsinzwe na US Monastir yo muri Tunisia inafite igikombe giheruka amanota 84 kuri 79.
Mu mikino ya BAL 2022 aya makipe nabwo yari kumwe mu itsinda aho ikipe ya REG BBC yatsinze US Monastir amanota 77 kuri 74 ndetse REG BBC igasoza ari yo iyoboye itsinda.
Undi mukino wabaye, ikipe ya Kwara Falcons yo muri Nigeria yatsinze na ABC Fighters amanota 79 kuri 76. Iyi kipe ya Kwara Falcons ikaba yasoje imikino 5 yose iyitsinzwe.
Nyuma y’imikino ibanziriza iy’umunsi wa nyuma, ikipe ya ABC Fighters ni yo iyoboye urutonde ikurikiwe na US Monastir, REG BBC yari imaze igihe iyoboye urutonde kuva ku munsi wa mbere iri ku mwanya wa 3, ikipe ya AS Douanes iri ku mwanya wa 4, Stade Malien iri ku mwanya wa 5 naho ikipe ya Kwara Falcons iri ku mwanya wa nyuma wa 6.
Imikino yo mu itsinda rya “Sahara Conference” irasozwa uyu munsi
Kuri uyu wa Kabiri taliki 21 Werurwe 2023 ni bwo hasozwa imikino yo mu itsinda rya “Sahara Conference”. Ikipe ya Stade Malien irakina na ABC Fighters saa kumi (16h00) i Dakar akaba ari saa kumi n’ebyiri (18h00) i Kigali.
Undi mukino uteganyijwe, ikipe ya US Monastir irakina na AS Douanes saa moya n’igice (19h30) i Dakar akaba ari saa tatu n’igice (21h30) i Kigali.
Nyuma y’iyi mikino ni bwo hamenyekana urutonde ntakuka rw’amakipe 4 agomba gukomeza mu cyiciro cy’imikino ya nyuma “BAL Playoffs & Finals” izabera i Kigali muri Gicurasi 2023.
-
- Werurwe 21, 2023
- Hashize imyaka 4
