Cricket: Irushanwa “Dafabet RCA T10 Women’s Tournament 2023” riratangiza umwaka w’imikino

Taliki 04-03-2023

Indatwa Hampshire CC- White Clouds CC (9h00)

Sorwathe CC-Gahanga Queens CC (11h30)

White Clouds CC- Charity CC (13h45)

Taliki 05-03-2023

White Clouds CC- Sorwathe CC (9h00)

Sorwathe CC-Indatwa Hampshire (11h30)

Charity CC- Gahanga Queens (13h45)

Kuva kuri uyu wa Gatandatu taliki 04 Werurwe 2023 i Gahanga haratangira irushanwa  ry’amakipe y’icyiciro cya mbere mu  bagore ryateguwe n’ishyirahamwe ry’umukino wa Cricket mu Rwanda “RCA” ku bufatanye na Dafabet  “Dafabet RCA T10 Women’s Tournament 2023”.

Iri rushanwa rizasozwa taliki 12 Werurwe 203 ryitabiriwe n’amakipe 5 asanzwe akina shampiyona y’icyiciro cya mbere   ari yo White Clouds CC, Sorwathe CC, Indatwa Hampshire CC, Charity CC na Gahanga Queen’s.

Ku munsi wa mbere w’iri rushanwa, taliki 4 Werurwe 2023, ikipe  ya Indatwa Hampshire CC irakina na White Clouds CC (9h00), Sorwathe CC ikine na Gahanga Queens CC (11h30) naho White Clouds CC ikine na Charity CC (13h45).

Ku munsi wa kabiri taliki 5 Werurwe 2023, ikipe ya White Clouds CC izakina na  Sorwathe CC (9h00),  Sorwathe CC ikine na Indatwa Hampshire (11h30) naho Charity CC ikine na  Gahanga Queens (13h45).

Imikino izakomeza taliki 11  na 12 Werurwe 2023 ari bwo izasozwa aho ikipe ya mbere  n’iya kabiri zizakina umukino wa nyuma wo guhatanira igikombe.

Iyi mikino yose izabera kuri Sitade Mpuzamahanga y’umukino wa Cricket i Gahanga.

Umuyobozi ushinzwe ibikorwa muri RCA, Byiringiro Emmanuel yatangaje ko iri rushanwa ari ryo rigiye gutangiza umwaka w’imikino muri RCA kandi ko rigiye gufasha cyane ikipe y’abagore kwitegura  irushanwa mpuzamahanga rizabera i Lagos muri Nigeria ” NCF Women’s T20 International Cricket Tournament 2023″  kuva taliki 19 kugeza 26 Werurwe 2023.

Amakipe 6 ni yo azitabira iri rushanwa  ari  yo Nigeria, u Rwanda, Ghana, Sierra Leone, Gambia na Cameroon.

Ikipe y’ u Rwanda  ikaba ari yo yegukanye iri rushanwa ubwo riheruka umwaka ushize wa 2022.

Byiringiro avuga ko nyuma y’iri rushanwa “Dafabet RCA T10 Women’s Tournament 2023” hazakurikiraho irushanwa ry’abahungu aho na bo bazabanza gukina “T10” kuva taliki 18 Werurwe 2023.