BAL 2023: REG BBC yatangiye kwitegura imikino yo mu itsinda A

Taliki 12-03-2023

REG BBC- Kwara Falcons (16h00)

Taliki 14-03-2023

ABC Fighters-REG BBC (21h30)

Taliki 15-03-2023

REG BBC-AS Douanes (21h30)

Taliki 18-03-2023

Stade Malien-REG BBC (16h00)

Taliki 20-03-2023

REG BBC- US Monastir (21h30)

Ikipe ya  REG BBC  yatangiye kwitegura imikino yo mu itsinda A “Sahara Conference” mu  mikino y’Afurika “Basketball Africa League (BAL 2023)”.

Iyi mikino yo mu itsinda A “Sahara Conference”  izabera muri Dakar Arena  muri Senegal taliki 11 kugeza 21 Werurwe 2023.

Iri tsinda  rigizwe na ABC Fighters (Côte d’Ivoire), AS Douanes (Senegal), Kwara Falcons (Nigeria), REG BBC (Rwanda), Stade Malien (Mali) na US Monastir (Tunisia).

Aya makipe azakina hagati yayo hanyuma 4 ya mbere abone itike yo kuzakina imikino ya nyuma.

Imikino yo mu itsinda B izabera mu Misiri

Myuma y’imikino yo mu itsinda A izabera muri Senegal, biteganyijwe ko  taliki 26 Mata kugeza 06 Gicurasi 2023 hazaba imikino yo mu itsinda B “Nile Conference”, ikaba  izabera muri Hassan Mostafa Indoor Sports Complex i Cairo mu Misiri.

Iri tsinda B rigizwe na Al Ahly (Egypt), Cape Town Tigers (South Africa), City Oilers (Uganda), CFV Beira (Mozambique), Petro de Luanda (Angola) na  SLAC (Guinea).

Muri iri tsinda na ho amakipe azahura hanyuma 4 ya mbere akomeze mu mikino ya nyuma.

Biteganyijwe ko imikino y’icyiciro cya nyuma “Playoffs & Finals” izabera mu Rwanda muri  BK Arena kuva taliki 21 kugeza 27 Gicurasi 2023.

Iri rushanwa rifite abaterankunga batandukanye barimo RDB, NIKE, Jordan Brand and Wilson, Hennessy  na  Envol City.

Ikipe ya REG BBC yatangiye kwitegura

Ku ruhande rw’ikipe ya REG BBC izaba ihagarariye u Rwanda ikaba ari inshuro ya kabiri igiye gukina iri rushanwa yamaze gusinyisha bamwe mu bakinnyi izifashisha barimo Hagumintwari Steven, Ndizeye Ndayisaba Dieudonne  bakinira ikipe ya Patriots BBC, Nshobozwabyosenumukiza  Jean Jacques Wilson wahoze akinira iyi kipe na Ntore Habimana bakinira ikipe ya APR BBC.

Aba bakaba biyongereye ku bakinnyi iyi kipe isanganwe barimo Adonis Filer, Pitchou Manga,  Engelbert Beleck, Cleveland Thomas Jr n’abandi.

Iyi kipe ikaba yaramaze kuzana umutoza ukomoka muri USA, Dean Murray akazaba yungirijwe na Mwiseneza Maxime.

Imyitozo yatangiye taliki 13 Gashyantare 2023  muri LDK ari nabwo ubuyobozi bwa BAL bwashyiraga ahagaragara uko amakipe azahura.

Iyi kipe ya  REG BBC izitabira iyi mikino ya BAL 2023  nyuma yo gukina imikino ibiri ikomeye ya shampiyona harimo uwo izakina na APR BBC  taliki 17 Gashantare 2023 ndetse n’umukino uzayihuza na Patriots BBC zisanzwe zihanganira igikombe ukaba uzaba taliki 24 Gashyantare 2023. Iyi mikino yombi ikaba izabera muri LDK mu Rugunga.

Ikipe ya REG BBC muri BAL 2022 yitwaye neza mu itsinda A  “Sahara Conference”  ikomeza ari iya mbere gusa iviramo muri ¼  itsinzwe na FAP yo muri Cameroun yari yabaye iya 4 mu itsinda B. Uyu mwaka iyi kipe ikaba ifite intego yo kwitwara neza  ikaza mu makipe 4 ya mbere ndetse ikarenga muri ¼  cy’irangiza.

Ubwo imikino ya BAL yabaga bwa mbere muri 2021, ikipe ya Patriots BBC yari ihagarariye u Rwanda yageze muri ½  cy’irangiza  isoreza ku mwanya wa 4 muri rusange.

Irushanwa riheruka “BAL 2022” ryegukanwe n’ikipe ya US Monastir yo muri Tunisia itsinze ku mukino wa nyuma ikipe  ya Petro de Luanda yo muri Angola amanota  83 kuri 72. Ikipe ya Zamalek BBC yo mu Misiri yegukanye BAL 2021 ubwo yakinwaga bwa mbere yasoreje ku mwanya wa 3.