Handball: Ikipe y’u Rwanda U-20 yitabiriye imikino y’Afurika muri Congo Brazzaville

Taliki 16-01-2023

Madascar-Rwanda

Taliki 17-01-2023

Rwanda-Congo Brazzaville

Taliki 18-01-2023

Guinea-Rwanda

Taliki 19-01-2023

Rwanda-Nigeria

Taliki 20-01-2023

Zimbabwe-Rwanda

Kuva taliki 16 kugeza 20 Mutarama 2023 muri Congo Brazzaville hazabera imikino y’Afurika “IHF Trophy Continental Phase-Africa 2023” mu  cyiciro cy’abatarengeje imyaka 18 ndetse n’abatarengeje imyaka 20 mu bahungu.

Mu  batarengeje imyaka 18 hazitabira amakipe 5 yabonye itike binyuze muri Zone. Aya ni Zambia (Zone 6), Congo Brazzaville (Zone 4), Burundi (Zone 5), Guinea (Zone 2) na Nigeria (Zone 3).

Mu batarengeje imyaka 20 hazitabira amakipe 6 na yo yabonye itike binyuze muri Zone. Muri  aya makipe harimo Congo Brazzaville (Zone  4), Zimbabwe (Zone 6), u Rwanda ( Zone 5), Guinéa (Zone 2), Nigeria (Zone 3) na Madagascar (Zone 7).

Ikipe y’u Rwanda yasabwe kwitwara neza

Kuri uyu wa Gatanu taliki 13 Mutarama 2023 ni bwo ikipe y’u Rwanda  yerekeza muri  Congo Brazzaville. Mbere yo  guhaguruka mu Rwanda, iyi kipe yashyikirijwe ibendera ry’igihugu na Minisiteri ya Siporo « MINISPORTS » yari ihagarariwe na Habyarimana Florent akaba yari kumwe na Perezida w’ishyirahamwe ry’umukino wa Handball mu Rwanda «FERWAHAND », Twahirwa Alfred.

Ikipe y’u Rwanda ikaba yasabwe kwitwara neza igahesha ishema igihugu ndetse ikegukana igikombe.

Kapiteni w’ikipe y’u Rwanda, Kubwimana Emmanuel yatangaje ko mu butumwa bahawe basabwe kuzitwara neza  ndetse no gutwara igikombe kandi ko impanuro n’inama bahawe byabongereye imbaraga bakaba bagiye bafite intego yo kuzakora ibishoboka byose  bakegukana intsinzi.

Umutoza mukuru w’ikipe y’u Rwanda, Rtd CIP Ntabanganyimana Antoine yatangaje ko babatumye guhagararira igihugu neza no kugihesha ishema bakazatahana umwanya mwiza kandi umwanya mwiza akaba ari ukwegukana igikombe. Akomeza avuga ko nk’abatoza bizera ko ibyo basabwe bazabishyira mu bikorwa.

Umutoza Ntabanganyimana yavuze ko muri rusange imyiteguro  yagenze neza aho abakinnyi babahaye imyitozo yongera ingufu, amayeri y’umukino, uburyo bwo gutsinda ndetse no kurinda izamu ryabo akaba yizera ko rero bizabafasha kwitwara neza.

Perezida wa FERWAHAND, Twahirwa Alfred yavuze ko iyi kipe yitwaye neza yegukana igikombe cy’Akarere ka 5  none ikaba igiye gukina imikino y’Afurika. Ati : «Twabasabye ko bagenda bakitwara neza bakazabona itike yo guhagararira Afurika mu mikino yo ku rwego rw’Isi ».

Abakinnyi ikipe y’u Rwanda izifashisha

Aba ni Nsabimana Dominique, Uwayezu Arsene, Nshimyumuremyi Fred, Byiringiro Jean D’Amour, Mbesutunguwe Samuel, Iragena Emmanuel, Kubwimana Emmanuel, Muhumure Elysee, Mugabo Samuel, Hakizimana Thierry, Ndayisabye Etienne, Akayezu Andre, Kayijamahe Yves na Nshimyumukiza Donath.

Muri buri cyiciro amakipe azakina hagati yayo hanyuma ikipe ya mbere izabone itike yo kwitabira imikino yo ku rwego rw’Isi «IHF Inter-Continental Trophy  2023 » izaba muri Werurwe 2023.

Mu cyiciro cy’abatarengeje imyaka 20, iyi mikino izitabirwa n’amakipe yose avuye ku migabane itandukanye aho azahura hanyuma ikipe ya mbere ibone itike  yo kuzitabira imikino y’igikombe cy’Isi mu batarengeje imyaka 21 “IHF Men’s Junior World Championship 2023” izabera mu Budage no mu  Bugereki kuva taliki 20 Kamena kugeza 02 Nyakanga 2023.

Amakipe azitabira iyi  mikino y’igikombe cy’Isi akaba yaramaze kumenyekana, azaserukira Afurika  harimo  Algeria, Angola, Misiri na Tunisia yabonye itike mu mikino y’Afurika yabereye mu Rwanda muri Kanama 2022.

Mu cyiciro cy’abatarengeje imyaka 19 “IHF Men’s Youth World Championship 2023” imikino izabera muri Croatia taliki 02 kugeza 13 Kanama 2023. Amakipe azaserukira Afurika arimo u Burundi, Misiri, Maroc  n’u Rwanda. Aya makipe akaba yarabonye itike mu mikino y’Afurika yabereye mu Rwanda muri Nzeri 2022.