Cricket: Harasozwa irushanwa “Tri-Nation T20 Cup 2022″

Tanzania 136-108 Rwanda

Uganda 183-176 Tanzania

Taliki 23-12-2022

Uganda-Rwanda (Gahanga-09h30)

Tanzania-Uganda (Gahanga-13h45)

Imikino y’irushanwa “Tri-Nation T20 Cup 2022″ irasozwa kuri uyu wa Gatanu taliki 23 Ukuboza 2022 hakinwa imikino ibiri y’umunsi wa 9.

Mbere y’iyi mikino ya nyuma, ku wa Kane taliki 22 Ukuboza 2022 ni bwo hakinwe imikino  y’umunsi wa 8. Muri iyi mikino, ikipe ya Tanzania yatsinze u Rwanda  nyuma  na yo itsindwa na Uganda.

Mu mukino wa mbere, ikipe ya Tanzania yatsinze u Rwanda ku kinyuranyo cy’amanota 28.

Muri uyu mukino, ikipe ya Tanzania ni yo yatangiye ikubita agapira ishaka amanota “Batting” maze mu dupira 120 (20 Overs) ikora amanota 136 mu gihe abakinnyi 9 basohowe mu kibuga (9 Wickets).

Mu gice cya kabiri ikipe y’u Rwanda yatangiye gukubita agapira ishaka amanota “Batting” aho yasabwaga 137. Mu dupira 120 ( 20 Overs) yakoze amanota 108 mu gihe abakinnyi 9 ari bo basohowe mu kibuga (9 Wickets).

Ally Mpeka Kimote ukinira Tanzania ni we mukinnyi  witwaye neza muri uyu mukino aho  yakoze amanota 13 akanasohora abakinnyi 4 b’u Rwanda mu kibuga.

Umukino wa kabiri, ikipe ya Uganda yatsinze Tanzania ku kinyuranyo cy’amanota 7.

Muri uyu mukino, ikipe ya Uganda ni yo yatangiye ikubita agapira ishaka amanota “Batting” maze mu dupira 120 (20 Overs) ikora amanota 183 mu gihe abakinnyi 5 ari bo basohowe mu kibuga (5 Wickets).

Mu gice cya kabiri, ikipe ya Tanzania yatangiye gukubita agapira ishaka amanota « Batting » aho yasabwaga 184. Mu dupira  118 (19.4 Overs), abakinnyi 10 ba Tanzania basohowe mu kibuga mu gihe bari bamaze gukora amanota 176.

Umukinnyi wa Uganda, Simon Ssesazi ni we witwaye neza muri uyu mukino aho yatsinze amanota 100 mu dupira 58.

Mbere y’imikino y’umunsi wa nyuma, ikipe ya Uganda ni yo ikomeje kuyobora urutonde n’amanota 17, ikurikiwe na Tanzania n’amanota 13 mu gihe ikipe y’u Rwanda iri ku mwanya wa 3 n’amanota 2.

Gahunda y’imikino y’umunsi wa nyuma

Kuri uyu wa Gatanu taliki 23 Ukuboza 2022 ni bwo hakinwa imikino y’umunsi wa 9 ari na yo ya nyuma. Ikipe  ya Uganda irakina n’u Rwanda (09h30) nyuma iyi ikine na Tanzania (13h45). Imikino yombi irabera kuri Sitade Mpuzamahanga ya Gahanga.

 Iri rushanwa  ryari ryatangiye taliki 13 Ukuboza 2022 ryateguwe mu rwego rwo gufasha aya makipe kwitegura imikino ya nyuma ku rwego rw’Afurika yo gushaka itike y’igikombe cy’Isi muri 2024 “Africa Regional Finals” izabera muri Namibia mu Kwakira 2023.