Tennis: John Njogu na Angela Okutoyi ni bo begukanye Rwanda Open 2022

Kuva taliki 12 kugeza 18 Ukuboza 2022 habaye irushanwa mpuzamahanga mu mukino wa Tennis “Rwanda Open 2022” ribera  ku bibuga byo muri IPRC Kigali aho ryitabiriwe n’abakinnyi barenga 150 mu byiciro bitandukanye.

Abakinnyi bakomoka muri Kenya ni bo bitwaye neza aho Albert John Njogu mu bagabo na  Angela Okutoyi mu bagore ari bo begukanye iri rushanwa ryaherukaga gukinwa muri 2019.

Mu bagabo babigize umwuga, Albert John Njogu yatsinze Ismael Changawa wegukanye Rwanda Open 2019  ku mukino wa nyuma  amaseti 2-1 (6-4, 4-6 na 6-1). Aba bakinnyi bombi bakaba bakomoka muri Kenya.

Albert John Njogu   yageze ku mukino wa nyuma asezereye mugenzi we wo muri Kenya, Kibet Yego  muri ½  ku maseti 2-0 (7-5 na 6-4) naho Ismael Changawa akaba yarasezereye Derick Stanley Ominde (Kenya) ku maseti 2-0 (6-3 na 6-2).

Bamwe mu bakinnyi bari bahagarariye u Rwanda baviriyemo muri ¼ cy’irangiza barimo Hakizumwami Junior watsinzwe na Ismail Changawa Ruwa (Kenya) amaseti 2-0 (6-0 na 6-1), Havugimana Olivier watsinzwe na Derick Stanley Ominde (Kenya) amaseti 2-1 (7-6, 4-6 na 6-4), Niyigena Etienne watsinzwe na Albert John Njogu amaseti 2-0 (6-1 na 6-2) ndetse na Muhire Joshua watsinzwe na Kibet Yego (Kenya) amaseti 2-0 (6-2 na 6-2).

Mu bagore, Angela Okutoyi yatsinze ku mukino wa nyuma murumuna we Roselida Asumwa amaseti 2-0 (6-1 na 6-2) bombi bakaba bakomoka muri Kenya.

Angela Okutoyi yageze ku mukino wa nyuma asezereye muri ¼ Nancy Aliyson Onya (RDC) wegukanye Rwanda Open 2016 ku maseti 2-0 (6-1 na 6-0) anasezerera muri ½ cy’irangiza  Cheruto Wanjala (Kenya) ku maseti 2-0 (6-1 na 6-0). Roselida Asumwa we yageze ku mukino wa nyuma  asezereye muri ½ Tuyisenge Olive (Rwanda) wari wageze ku mukino wa nyuma muri 2019.

Mu cyiciro cy’abakina ari babiri mu bagabo “Men Doubles”,  ikipe yari igizwe na Ismael Changawa (Kenya) na Cuma Issa (Burundi) yegukanye irushanwa itsinze ikipe yari igizwe na Muhire Joshua na Tuyishime Fabrice (Rwanda) ku maseti 2-1 ( 6-3, 3-6 na 10-5).

Mu bagore “Women Doubles”, ikipe ya Roselida Asumwa na Angela Okutoyi (Kenya) yatsinze  iya Martin Mao na Mohamed Nankulange (Tanzania) ku mukino wa nyuma amaseti 2-0 (6-1 na 6-0).

Habaye irushanwa mu cyiciro cy’abafite ubumuga

Muri Rwanda Open 2022 habaye irushanwa mu cyiciro cy’abafite ubumuga bakina bicaye mu tugare “Wheelchair Tennis” mu bagabo n’abagore aho bakinnye umukinnyi ku giti cye ndetse n’icyiciro cy’abakina ari babiri.

Mu bagabo, Abdallah Athman (Kenya) ni we wegukanye irushanwa atsinze ku mukino wa nyuma Jumanne Nasoro Zea (Tanzania) ku maseti 2-1 (0-6, 6-4 na 6-3).

Bamwe mu bakinnyi bari bahagarariye u Rwanda, Hakizimana Emmanuel na Dusabimana Viator  baviriyemo muri ½ cy’irangiza.

Mu bagore,  Jane Ndenga ukomoka muri Kenya yegukanye irushanwa  atsinze ku mukino wa nyuma  Rehema Saidi Selemani(Tanzania) ku maseti 2-1 (4-6, 6-4 na 6-2).

Mu bakina ari babiri mu bagabo “Men Doubles Wheelchair Tennis”, ikipe ya Abdallah Athman (Kenya) na Hakizimana Emmanuel (Rwanda) yatsinze iya Albert John Churi na Jumanne Nasoro Zea (Tanzania) amaseti 2-0 (6-3 na 7-6).

Mu bagore  “Women Doubles Wheelchair Tennis”,  ikipe ya Phoebe Mating’i Masika (Kenya) na Rehema Saidi Selemani (Tanzania) yatsinze iya Jane Ndenga na Asiya Mohamed Sururu (Kenya) amaseti 2-0 (6-4 na 6-2).

Mu babigize umwuga umukinnyi wa mbere mu bagabo n’abagore yahembwe ibihumbi 2,5  by’amadolari y’Amerika (2500$). N’abandi bitwaye neza mu bindi byiciro bahawe ibihembo  aho byose byanganaga n’ibihumbi 30 by’amadolari  y’Amerika.

Iri rushanwa “Rwanda Open 2022”  ryateguwe n’ishyirahamwe ry’umukino wa Tennis mu Rwanda “RTF” ku bufatanye na Minisiteri ya Siporo “MINISPORTS”, ryari rimaze imyaka 2  ritaba kuko ryaherukaga muri 2019 naho muri 2020 na 2021 rikaba ritarabaye kubera COVID-19.

Perezida  wa RTF, Karenzi Théoneste yavuze ko bishimiye uko iri rushanwa ryagenze ndetse ko hari byinshi  abakinnyi b’Abanyarwanda bigiye ku banyamahanga baryitabiriye.

Yakomeje avuga ko intego bihaye ari uko rigomba kujya riba buri mwaka ndetse bakanareba uko bakomeza kuzamura ibihembo kugira ngo rijye ryitabirwa n’abakinnyi  bakomeye.