Basketball: Alexandria SC yegukanye igikombe cy’Afurika, APR BBC yegukana umwanya wa 8

Kuva taliki 09 kugeza 17 Ukuboza 2022 i Maputo muri Mozambique habereye  imikino y’Afurika y’amakipe mu cyiciro cy’abagore “FIBA Women Champions Club 2022”.

Ikipe ya Alexandria SC yo mu Misiri  ni yo yegukanye igikombe itsinze ku mukino wa yuma ikipe ya Costa do Sol BBC yo muri Mozambique amanota 65 kuri 58 naho ikipe ya Ferroviario de Maputo BBC   yegukana umwanya wa 3 itsinze  InterClube de Luanda amanota 71 kuri 67.

Izi kipe akaba ari zo zari zahuriye ku mukino wa nyuma mu irushanwa ry’Afurika riheruka muri 2019 aho  Ferroviario de Maputo BBC  yegukanye igikombe itsinze  InterClube de Luanda amanota 91 kuri 90.

Ikipe ya APR BBC yari ihagarariye u Rwanda ikaba yarasoreje ku mwanya wa 8 aho nta mukino n’umwe yabashije gutsinda muri 6 yakinnye.  Iyi kipe  yaherukaga kwitabira iyi mikino y’Afurika muri 2008 ubwo  yaberaga muri Kenya aho yasoreje ku mwanya wa 7.

Uko imikino yagenze

Iri rushanwa ryari ryitabiriwe n’amakipe 9 aho yashyizwe mu matsinda 2. Itsinda A ryari rigizwe na InterClube de Luanda (Angola), KPA (Kenya), Costa do Sol BBC, ASB CNSS (RDC) na Energie BBC (Benin). Itsinda B ryari rigizwe na APR BBC (Rwanda), Alexandria SC (Misiri), Ferroviario de Maputo BBC  (Mozambique), ASC Ville Dakar (Senegal).

Muri buri tsinda amakipe yakinnye hagati yayo  hanyuma 4 ya mbere mu itsinda A akomeza muri ¼  uretse ikipe Energie BBC (Benin) yabaye iya 5 naho  amakipe 4 yose yo mu itsinda B akomeza muri ¼.

Ikipe ya APR BBC mu mikino yo mu itsinda B yatsinzwe na Ferroviario de Maputo BBC amanota 78 kuri 45, itsindwa na Alexandria SC amanota 89 kuri 68 inatsindwa na ASC Ville Dakar amanota 57 kuri 37.

Muri ¼, ikipe ya APR BBC yatsinzwe na InterClube BBC  amanota 94 kuri 53. Mu guhatanira imyanya 5-8, APR BBC yatsinzwe na KPA amanota 67 kuri 38. Mu guhatanira umwanya wa 7 na 8, iyi kipe ya APR BBC itsindwa  na CNSS amanota 72 kuri 52.

Uko amakipe yakurikiranye

Ikipe ya Alexandria SC yegukanye umwanya wa mbere ikurikirwa na Costa do Sol BBC (2), Ferroviario de Maputo BBC (3), InterClube de Luanda (4), ASC Ville Dakar (5), KPA (6), CNSS (7), APR BBC (8) na Energie BBC (9).