Cricket: Tanzania yatangiye itsinda u Rwanda mu irushanwa “Tri-Nation T20 Cup 2022″

Tanzania 147-81 Rwanda

Rwanda 110-114 Tanzania

Taliki 14-12-2022

Rwanda-Uganda (Gahanga-09h30)

Uganda-Tanzania (Gahanga-13h45)

Kuva kuri uyu wa Kabiri taliki 13 Ukuboza 2022 mu Rwanda hatangiye irushanwa  “Tri-Nation T20 Cup 2022″ rihuza ibihugu bitatu ari byo u Rwanda, Uganda na Tanzania, rikazasozwa taliki 23 Ukuboza 2022. Aya makipe azakina hagati yayo aho imikino yose izabera kuri Sitade Mpuzamahanga ya Gahanga.

Ku munsi wa mbere w’iri rushanwa, ikipe ya Tanzania yitwaye neza itsinda u Rwanda imikino yombi.

Umukino wa mbere, kubera ikirere hakinwe udupira 78 (13 Overs). Ikipe ya Tanzania ni yo yatangiye ikubita agapira ishaka amanota “Batting” maze mu dupira 78 (13 Overs) ikora amanota 147 mu gihe abakinnyi 4 ari bo basohowe mu kibuga (4 Wickets).

Mu gice cya kabiri, ikipe y’u Rwanda yasabwaga amanota 148 yatangiye gukubita agapira ishaka amanota “Batting” maze mu dupira 78 (13 Overs) ikora amanota 81 mu gihe abakinnyi 4 ari bo basohowe mu kibuga (4 Wickets).

Ikipe ya Tanzania yegukanye intsinzi ku kinyuranyo cy’amanota 66.  Umukinnyi wa Tanzania, Amal Rajeevan wa Tanzania ni we witwaye neza muri uyu mukino aho yakoze  amanota 61 mu dupira 28 yakinnye.

Mu mukino wa kabiri, hakinwe udupira 90 (15 Overs) aho kuba 120 (20 Overs). Ikipe y’ u Rwanda yatangiye ikubita agapira ishaka amanota “Batting” maze mu dupira 90  ikora amanota 110 mu gihe abakinnyi 5 basohowe mu kibuga (5 Wickets).

Mu gice cya kabiri, ikipe ya Tanzania yasabwaga amanota 111 ngo yegukane intsinzi  yatangiye gukubita agapira ishaka amanota “Batting” maze mu dupira 85 (14,1 Overs) ikora amanota 114 mu gihe abakinnyi  5 ari bo basohowe mu kibuga (5 Wickets).

Umukinnyi, Abhik Patwa wa Tanzania ni we witwaye neza muri uyu mukino aho yatsinze amanota 45 mu dupira 30.

Gahunda y’imikino y’umunsi wa kabiri

Ku munsi wa kabiri w’iri rushanwa, taliki 14 Ukuboza 2022 hateganyijwe imikino ibiri aho ikipe y’u Rwanda ikina na Uganda i Gahanga (09h30) nyuma iyi kipe ya Uganda ikine na Tanzania i Gahanga (13h45).

Iri rushanwa ryagomba kwitabirwa n’ikipe ya Kenya ariko ntiyaboneka. Muri rusange ryateguwe mu rwego rwo gufasha aya makipe kwitegura imikino ya nyuma ku rwego rw’Afurika yo gushaka itike y’igikombe cy’Isi “Africa Regional Finals” izabera muri Namibia mu Kwakira 2023. Aya makipe; u Rwanda, Uganda, Kenya, Tanzania, Nigeria, Namibia na Zimbabwe akaba azahatana hanyuma amakipe abiri abone itike y’igikombe cy’Isi “ICC Men’s T20 World Cup 2024” kizabera muri West Indies na  USA muri Kamena 2024.