Basketball: Irushanwa “Legacy Tournament 2022” rigiye gutangira

Kuva kuri uyu wa Gatanu  taliki 21 Ukwakira 2022 haratangira irushanwa “Legacy Tournament  2022” ryateguwe  n’ikipe ya UGB ku bufatanye n’ishyirahamwe ry’umukino wa Basketball mu Rwanda “FERWABA” mu rwego rwo kuzirikana abashinze iyi kipe.

Iri rushanwa rizaba mu byiciro bibiri ahagomba kubanza irushanwa ry’amakipe y’imbere mu gihugu hanyuma hakazasoza haba irushanwa mpuzamahanga ahagomba kwiyongeramo amakipe yo hanze.

Taliki 21 na 22 Ukwakira hateganyijwe irushanwa ry’amakipe  y’imbere mu gihugu mu cyiciro cya mbere mu  bagabo  ndetse no mu bakanyujijeho.

Amakipe 4 mu bagabo mu cyiciro cya mbere  ni yo azitabira aho yashyizwe mu matsinda abiri, itsinda A ririmo Espoir BBC na UGB naho itsinda B rikaba ririmo APR BBC  na Shoot 4 The Stars.

Mu bakanyujijeho na ho hitabiriye amakipe 4  aho yashyizwe mu matsinda abiri, itsinda A rigizwe na UGB na CSK BBC na ho itsinda B ririmo Patriots BBC  na Musanze BBC.

Ku munsi wa mbere, taliki 21 Ukwakira 2022,  hateganyijwe imikino ibiri aho ikipe ya Shoot 4 The Stars igomba gukina na APR BBC (18h00) naho UGB igakina na Espoir BBC (20h00). Imikino yombi izabera  muri STECOL mu cyanya cyahariwe inganda i Masoro.

Ku munsi wa kabiri, taliki 22 Ukwakira 2022 hazaba imikino 2 mu bakanyujijeho  aho ikipe ya UGB izakina na CSK BBC (12h00) na ho Musanze FC ikine Patriots BBC.

Mu makipe y’icyiciro cya mbere hazaba imikino yo kwishyura aho ikipe ya Espoir BBC izakina na UGB (16h00) naho ikipe Shoot 4 The Stars ikine na APR BBC (18h00). Iyi mikino yose izabera  muri STECOL.

Taliki 26 kugeza 29 Ukwakira 2022 ni bwo irushanwa “Legacy Tournament  2022” rizasozwa ahateganyijwe imikino mpuzamahanga mu makipe y’icyiciro cya mbere mu bagabo, mu bagore ndetse no mu bakanyujijeho mu bagabo. Hari kandi n’imikino izahuza amashuri ahazitabira amakipe 4.

Mu bagabo, itsinda A rizaba rigizwe na New Star BBC (Burundi), ikipe ya mbere mu itsinda A mu marushanwa y’imbere mu gihugu (hagati ya UGB na Espoir BBC) ndetse n’ikipe ya kabiri mu itsinda B (hagati ya APR BBC na  Shoot 4 The Stars) naho itsinda B rizaba rigizwe na REG BBC (Rwanda), ikipe ya mbere mu itsinda B  n’ikipe ya kabiri mu itsinda A.

Mu bagore, itsinda A rigizwe na IPRC Huye BBC, PJB (RDC) na REG BBC naho itsinda B rigizwe na The Hoops BBC, Young Sisters BBC (Burundi) na Wonderful BBC (RDC).

Mu bakanyujijeho, itsinda A rizaba ririmo ikipe yatsinze mu irushanwa ry’imbere mu gihugu mu itsinda A (hagati ya UGB na CSK BBC)  na Techno BBC (Burundi) naho itsinda B rizaba rigizwe n’ikipe yatsinze hagati ya Patriots BBC  na Musanze BBC na Bakolo BBC (RDC).

Iri rushanwa rigiye kuba ku nshuro ya 3 riri muri gahunda yo guteza imbere umukino wa Basketball hongerwa amarushanwa, gufasha abakinnyi gukomeza gukina bitegura umwaka w’imikino utaha wa 2022-2023, guha agaciro  no kuzirikana  abagize uruhare mu burezi no gutoza abakinnyi batandukanye cyane cyane abashinze iyi kipe ya UGB  kuva mu 1998 ari bo Shampiyona Aimable wari umuyobozi wa LDK akaba yaritabye Imana muri 2004 na Nizeyimana Jean De Dieu wari umwarimu akaba yaritabye Imana muri 2007.