BK na Equity Bank ni zo zegukanye ibikombe mu mikino ihuza za Banki

Nyuma y’imyaka isaga itatu irushanwa rihuza za Banki mu Rwanda ridakinwa ryongeye kuba  maze ikipe ya BK muri Volleyball na Basketball ndetse n’ikipe ya Equity Bank mu mupira w’amaguru zegukana ibikombe.

Iri rushanwa “Interbank Sports Tournament 2022” ryatangiye taliki 03 Nzeri risoozwa 01 Ukwakira 2022, rikaba ryarateguwe n’ihuriro rya za Banki zikorera mu Rwanda “RBA”.

Banki 10 muri 15 ziri mu ihuriro ni zo zitabiriye iri rushanwa zihatana mu mikino 4 irimo umupira w’amaguru, Volleyball, Basketball ndetse no Koga “Swimming”.

Muri Basketball, ikipe ya  BK ni yo yegukanye igikombe itsinze ku mukino wa nyuma ikipe ya  Cogebanque amanota 91 kuri 56.

Ikipe ya BK kandi yegukanye igikombe muri Volleyball itsinze ikipe ya BPR amaseti 3-1  naho ikipe ya Cogebanque yegukanye umwanya wa 3.

Mu mupira w’amaguru, ikipe ya Equity Bank ni yo yegukanye igikombe itsinze ikipe ya BPR ibitego 4-1, umukino wabereye kuri Sitade Mumena.

Umuyobozi w’ihuriro rya za Banki zikorera mu Rwanda “RBA”, Ntore Tony Francis yagaragaje  ko bishimiye uko ryagenze ndetse n’umusaruro ryatanze nyuma y’igihe ritaba.

Yakomeje avuga ko iri rushanwa rifite byinshi risobanuye mu bakozi ba za Banki kuko bibafasha gukora siporo bigatuma  bagira ubuzima bwiza ndetse bakanahura bakaganira bakanamenyana nk’abantu batanga serivisi zimwe.

Iyi mikino ihuza za Banki yaherukaga kuba muri 2019, mu mwaka wa 2020 na 2021 nta bwo ryabaye kubera COVID-19.